Qaraǵandyda indetten jazylǵandar sany aýrýhanaǵa túsip jatqan naýqastardan kóp
NUR-SULTAN. QazAqparat – Qaraǵandy oblysynyń ákimi Jeńis Qasymbek óńirdegi epıdemıologııalyq ahýal jaıly Úkimetke esep berdi, dep habarlaıdy QazAqparat tilshisi.
«Naýqastaný kórsetkishiniń deńgeıi - 2 paıyzdan tómen. Sońǵy eki aptadaǵy taldaý jalpy epıdemıologııalyq jaǵdaıdyń turaqtanǵanyn kórsetip otyr. Qazirgi ýaqytta patsıentterdiń kúndelikti shyǵarylýy aýrýhanaǵa jatqyzý kórsetkishinen joǵary. Aýrýhanalardaǵy oryn júktemesi 50 paıyzǵa deıin tómendedi. Mysaly eki apta buryn bul kórsetkish - 80 paıyz bolǵan edi. Jedel járdem shaqyrý jaǵdaıy sońǵy aptada úsh ese tómendedi», - dedi Jeńis Qasymbek Úkimet otyrysynda.
Qaraǵandy oblysy ákiminiń aıtýynsha, kúz jáne qys mezgiline jan-jaqty daıyndyq júrgizilip jatyr. Aýrýhanalardaǵy oryn sany 4486-ǵa deıin jetkizildi. Aýrýhanalardy zamanaýı medıtsınalyq qurylǵylarmen jaraqtaý jalǵasýda.
«Pandemııanyń alǵashqy aılarynda qolda bar 42 ókpeni jasandy jeldetý apparatyna qosymsha 120 apparat, 160 ottegi kontsentratory satyp alyndy. Qazirgi tańda taǵy 90 ókpeni jasandy jeldetý apparaty alynyp jatyr. Onyń ony osy aptada jetkiziledi. Naýqastardy ottegimen qamtamasyz etý úshin 1500 kontsentrator satyp alyndy», - dedi ol.
