Qaraǵandyda HQKO-ǵa «bomba» qoıylǵany týraly jalǵan aqparat taratqan adam ustaldy
QARAǴANDY. QazAqparat – Qaraǵandyda 102 telefonyna Halyqqa qyzmet kórsetý ortalyǵy (HQKO) ǵımaratynda jarylǵysh zat qoıylǵany týraly jalǵan aqparat bergen er adam ustaldy.
Іzdeý barysynda tártip saqshylary 29 jastaǵy adamdy qamaýǵa aldy, dep habarlaıdy QazAqparat tilshisi.
Jedel-izdestirý is-sharalary barysynda Qaraǵandy oblysy PD ekstremızmge qarsy is-qımyl basqarmasynyń qyzmetkerleri kúdikti – 29 jastaǵy er adamdy anyqtap, ustady.
«Kúdikti óz kinásin moıyndady. Zattaı aıǵaq – uıaly telefon tárkilendi. Tergeý júrip jatyr»,-dep habarlady Qaraǵandy oblysy PD baspasóz qyzmeti.
Esterińizge sala keteıik, búgin Qaraǵandyda saǵat 9.00-de 102 telefonyna Muqanov kóshesindegi avto HQKO ǵımaratyna jarylǵysh zat qoıylǵany týraly jasyryn habarlama kelip túsip, ol jerge barlyq jedel qyzmet ókilderi jiberildi.
AvtoHQKO ǵımaratynan 31 adam evakýatsııalandy. Ony tekserý kezinde jarylǵysh zat tabylǵan joq.
Atalǵan fakti boıynsha QR QK 273-baby boıynsha sotqa deıingi tergeý bastaldy, ol 5 jylǵa bas bostandyǵynan aıyrý túrindegi sanktsııany kózdeıdi.
