Qaraǵandyda halyqqa qyzmet kórsetetin zamanaýı tsıfrlyq keńse ashyldy

QARAǴANDY. QazAqparat - Qaraǵandyda Kaıdzen tujyrymdamasy boıynsha jańǵyrtylǵan HQKO men avtoHQKO ashyldy. Bul - óndiristik protsesterdi únemi jetildirýge baǵyttalǵan tájirıbe. Jańa front-keńse Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsınge tanystyryldy, dep habarlaıdy QazAqparat tilshisi.

Azamattarǵa yńǵaıly bolý úshin eki HQKO-da Connection Point dep atalatyn ózine-ózi qyzmet kórsetý alańdary uıymdastyrylǵan. Kelýshiler operatordyń shaqyrýyn kútpeı-aq elektrondyq qyzmetterdi óz betinshe ala alady. Ol úshin munda smartfondar ornatylǵan, Wi-Fi, prınterler bar. Elektrondyq ýchaskelerde keńesshiler de jumys isteıdi.

«HQKO birinshi kezekte azamattarǵa yńǵaıly bolý úshin túbegeıli jańǵyrtýdan ótti. Front-keńse qysqa merzimde sapaly memlekettik qyzmet alý úshin barlyq qajetti jabdyqtarmen jáne tsıfrlyq júıelermen jabdyqtalǵan», - dep atap ótti Baǵdat Mýsın.

HQKO-larda operatsııalyq zaldyń dástúrli qyzmetteri kórsetiletin birneshe aımaq: zeınetaqy jáne memlekettik járdemaqylar máselelerine qatysty áleýmettik qyzmetter aımaǵy, turǵyndar qyzmetti 5 mınýt ishinde ala alatyn ekspress-aımaq, sondaı-aq qujattardy berý aımaǵy bar.

Aıta keteıik, jańa front-keńsege kúnine 600-ge jýyq adam keledi dep kútilýde. Aldyn ala boljam boıynsha, ózine-ózi qyzmet kórsetý sektoryna keminde 350 adam keletin bolady.

«Basty mindetimiz – sapaly jáne qoljetimdi memlekettik qyzmet kórsetý. Bizdiń aldymyzda Memlekettik korporatsııanyń front-ofısterin jańǵyrtý boıynsha úlken mindet tur. Biz halyqqa jaqyn bolýǵa umtylamyz, azamattardyń memlekettik qyzmetterdi alýyn jaqsartý jáne ońaılatý boıynsha is-sharalar qabyldaımyz. Kaizen tujyrymdamasyn elimizdiń basqa da HQKO-laryna engizýdi josparlap otyrmyz», - dep atap ótti «Azamattarǵa arnalǵan úkimet» memlekettik korporatsııasynyń Basqarma Tóraǵasy Súıenish Ábdildın.

Aıta ketý kerek, Qazaqstanda osyndaı jeti front-keńse bar. Olardyń negizgi maqsaty – HQKO-larda ózine-ózi qyzmet kórsetý úshin jaǵdaı jasaý jáne azamattardyń tsıfrlyq saýattylyǵyn arttyrý. Tsıfrlyq formatta qazaqstandyqtarǵa 1260 nemese 92% memlekettik qyzmet qoljetimdi.

Jańa tsıfrlyq front-keńse 134-shi eseptik kvartal, 709-qurylys mekenjaıy boıynsha ornalasqan. Munda memlekettik qyzmetterdi sapaly kórsetý úshin, onyń ishinde múmkindigi shekteýli adamdar úshin barlyq jaǵdaı jasalǵan, sondaı-aq olar úshin arnaıy shaqyrý batyrmasy ornatylǵan jáne jeke tereze jumys isteıdi. Balalary bar kelýshiler úshin ana men bala bólmesi jáne oıyn bólmesi bar.