Qaraǵandyda ǵaryshtyq monıtorıngte anyqtalǵan 12 ruqsatsyz qoqys tastaıtyn jer joıylady
QARAǴANDY. QazAqparat - Qaraǵandy oblysynyń ákimi jáne óńirdiń 20 myńnan astam turǵyny «Birge - taza Qazaqstan» ekologııalyq aktsııasyna qatysty, dep habarlaıdy QazAqparat tilshisi.
Búkil el boıynsha ashylǵan eko-chellendjge Qaraǵandy oblysynyń ákimi Erlan Qoshanov ta qoldaý kórsetti. Óńir basshysynyń bastamasymen jappaı ekologııalyq senbilik barlyq qalalar men aýdandarda ótti. Aýqymdy tazalyq sharasyna sheneýnikter, depýtattar, bıznesmender, eriktiler men qorshaǵan ortaǵa beı-jaı qaramaıtyn azamattar shyqty.
Erlan Qoshanov chellendjdiń qoǵamdy biriktirýge jáne ártúrli ıdeıalardy ilgeri tartýǵa septigin tıgizetin beıresmı tásili ekenin atap ótti.
Tabıǵı resýrstar jáne tabıǵat paıdalanýdy retteý basqarmasynyń basshysy Rýslan Tólepbaevtyń aıtýynsha, tek Qaraǵandyda ǵana aktsııaǵa shamamen 7 000 adam qatysyp, 4 tonna qoqys shyǵarylǵan. Oblys qalalary men aýdandarynda sý qoımalary men jol boıyndaǵy aýmaqtar qoqystan tazartyldy, ruqsat etilmegen qoqys tastaıtyn jerleri joıylady. Bul jumysqa oblys boıynsha barlyǵy 20 myńnan astam adam qatysty.
«Oblys ortalyǵynda ekologııalyq senbilik alty nysanda ótedi. Fedorov sý qoımasynyń jaǵalaýy, Kishi Buqpa ózeniniń arnasy, qatty turmystyq qaldyqtar polıgonyna irgeles aýmaq retke keltiriletin bolady. Sondaı-aq tazartý jumystary memlekettik orman qory aýmaǵynda júrgiziledi. Budan basqa, «Ǵarysh sapary» baǵdarlamasy boıynsha ǵaryshtyq monıtorıng kómegimen anyqtalǵan 12 ruqsat etilmegen qoqys orny joıylady. Osyndaı aktsııalar oblystyń barlyq qalalary men aýdandarynda ótedi. Samarqand, Keńgir sý qoımalary, Balqash kóli, on ózen arnasy tazartylady», - dedi ol.
«Qoǵamdyq tazalyqshylar desanty Fedorov sý qoımasynyń qalalyq jaǵajaıyna bardy. Jazǵy ystyqta qala turǵyndary bul orynǵa kóptep jınalady, demalýshylar kóbinese qoqystaryn tastap ketedi. Kóktemgi senbilikter kezinde jaǵalaýdan 53 júk kólikpen qoqys shyǵaryldy, al jaz bastalǵannen beri aı saıyn bul mańnan 10 júk kóligi toly qaldyq jınalady», dedi Qazybek bı atyndaǵy aýdan ákimi Tatıana Shatohına.
«Meniń oıymsha, mundaı aktsııalar bir kún ǵana jasalyp, umytylyp qalatyn shara emes. Mindetti túrde qandaı da bir izin qaldyrady. Ókinishke oraı, bizde áli de adamdarǵa ekologııalyq mádenıetti baýlyp, tárbıeleý kerek – uzaq ýaqyt boıy halyq tabıǵatqa, tazalyqqa jáne tártipke beıjaı qarap keldi. Al qazir biz osynyń bári bizdiń meken etip otyrǵan jerimiz ekenin túsinip, qorshaǵan ortany qorǵaý úshin qoldan kelgendi jasaýymyz kerek. Búgin men temeki tuqyldaryn jınadym, biraq olardyń barlyǵyn jınaý múmkin emes. Bul men úshin qıyn emes. Eger meniń bireýdiń sońynan qoqysyn jınap jatqanymdy kórer bolsa, ol adam kelesi joly qoqysty laqtyrmas buryn oılanady, temekisin jerge tastamaıtyn bolady. Osynyń barlyǵy jaı ǵana bir nárse istedim dep maqtaný úshin emes. Birtindep adamdar tazalyqqa osylaı úırenedi», - dep esepteıdi ekosenbilikke qatysýshysy, Qaraǵandy oblysynyń qurylysshylar qaýymdastyǵynyń dırektory Naılıa Qaıyrbekova.
Esterińizge sala keteıik, #Birge #TazaQazaqstan ekologııalyq senbilikteri búkil elimiz boıynsha ótýde. Aktsııany Memleket Basshysy Qasym-Jomart Toqaev, QR Premer-mınıstri Asqar Mamın men mınıstrler kabınetiniń músheleri qoldady.
