Qaraǵandyda ǵaryshta bolyp qaıtqan tuqymdardan ósimdikter ósiriledi
«Tuqymdar 2018 jyldyń 2 sáýirinde Jerden ushyp ketken SpaceX Dragon kemesiniń bortynda boldy. 2018 jyldyń 4 sáýirinde olardy Halyqaralyq ǵarysh stansasyna jetkizdi. Sonan soń 5 mamyrda qaıta jerge oraldy. Tuqymdar jıyrma mıllıon shaqyrymnan astam sapar shegip qaıtty, mende ony úsh tilde rastaıtyn hat bar. Men osy tuqymdardy osynda jetkizgenimizge óte qýanyshtymyn. Sál keshiksek te, Qaraǵandydaǵy egý naýqanyna oraı úlgerdik», - deıdi aeroǵaryshtyq ınjener, Reseıdegi NASA ókili Ched Roý.
Aǵashtardyń ósýin QarMÝ stýdentteri men oqytýshylary baqylaıtyn bolady. Mamandar taǵy bir tuqym partııasyn iriktep, saqtap qaldy. Olardy ǵaryshtyq sáýlelenýdiń áserin salystyrý jáne zertteý úshin ǵaryshta bolǵan ósimdikterdiń janynda otyrǵyzady.
«1975 jyly «Soıýz-19» jáne «Apollon» ǵarysh kemeleriniń synaqtyq ushýy kezinde astronavtar kanadalyq shyrshalardyń tuqymdarymen ózara almasqan bolatyn. Sodan keıin bul ósimdikter Máskeý men Novosibirde otyrǵyzyldy. Zertteý kórsetkendeı, alǵashqy on jylda tuqymdary ǵaryshta bolǵan aǵashtar 40%-ǵa ósip, jemis beredi. Ókinishke oraı, Keńes Odaǵy ydyraǵannan keıin bul zertteýler toqtatyldy», - dedi Qaraǵandy qalasy ákiminiń keńesshisi jáne tuqymdardy ǵaryshqa jiberý ıdeıasynyń bastamashysy Rýslan Telegın.
QarMÝ qyzmetkerleri NASA-men yntymaqtastyqty jalǵastyrý jáne ósimdikterge ǵaryshtyq sáýlelenýdiń áserin egjeı-tegjeıli zertteýdi ári qaraı jalǵastyrýdy josparlap otyr.