Qaraǵandyda Ǵalym Jarylǵapovty eske alý týrnıri ótip jatyr
Sporttyq jıynnyń ashylý saltanatyna oblys ákimi Erlan Qoshanov qatysty. Saıysqa Qytaı, Taıland, Reseı, Qyrǵyzstan, Ózbekstan, Tájikstan jáne Qazaqstannan jınalǵan 200-den astam sportshylar baq synamaq.
«Bizdiń shaqyrýymyzdy qabyl alyp, týrnırge kelgen árbir qonaq pen sportshylarǵa alǵysymdy bildirgim keledi. Ǵalym Jarylǵapov - biregeı tulǵa, úlken ustaz bolǵan, qazaqstandyq sporttyń damýyna úlken úles qosqan adam. Sondyqtan da ol bizdiń jadymyzda óz isiniń kemeńgeri, halqynyń birtýar uly retinde máńgi saqtalady. Búgingi týrnır - sonyń dáleli», - dedi óz sózinde aımaq basshysy.
Qurmetti qonaqtar retinde týrnırge bokstan álem chempıony Krıstına Hammer, gollıvýd akteri Igor Jıjıkın jáne stsenarıst Oleg Stepchenko keldi. Olarǵa ulttyq shapandar men estelik syılyqtar tabys etildi.
Týrnır 21-jeltoqsanǵa deıin jalǵasady. Bul Ǵalym Jarylǵapovtyń arýaǵyna baǵyshtalǵan 35-shi saıys. Ár kezeńderde chempıonattyń jeńimpazdary Vasılıı Jırov, Bolat Jumadilov, Ermahan Ybyraıymov, Arkadıı Topaev, Igor Shıshkın, Anatolıı Aleksandrov, Oleg Maskaev, Bekzat Sattarhanov, Gennadıı Golovkın, Serik Eleýov, Serik Sápıev sııaqty sheberler bolǵan.
Ǵalym Jarylǵapov bokstan Qazaqstannyń eńbek sińirgen jattyqtyrýshysy, KSRO sport sheberi bolǵan, «Eren eńbegi úshin» medalimen, Qazaq SSR Joǵarǵy Keńesiniń Qurmet gramotasymen, KOKP OK «Komsomolda belsendi eńbek etkeni úshin», «KSRO jáne QazSSR kásibı tehnıkalyq bilim ozaty», «KSRO dene shynyqtyrý jáne sport ozaty» belgilerimen marapattalǵan.