Qaraǵandyda evakýatsııalanǵan eki aýyldyń turǵyndary úılerine oraldy
QARAǴANDY. QazAqparat - Qazirgi tańda Qaraǵandy oblysyndaǵy eldi mekenderde sý tasqynyna qarsy jáne apattyq-qutqarý jumystary jalǵasýda.
Erekshe baqylaýǵa alynǵan aımaqtarǵa Buqar Jyraý, Qarqaraly, Abaı, Shet jáne Nura aýdandary kiredi, dep habarlaıdy óńirlik TJD.
Sý deńgeıiniń tómendeýine baılanysty Aqtóbe aýylynan evakýatsııalanǵan 62 jáne Andreınıkovka aýylynan 10 adam óz úılerine oraldy.
Sý tasqyny aımaǵynda apattyq-qutqarý jáne shuǵyl jumys júrgizý barysynda 1906 adam evakýatsııalanyp, 5468 bas iri jáne usaq qara mal qaýipsiz jerge aıdaldy.
Sý tasqyny kezeńinde erigen qar sýyn aıdaý úshin jáne eldi mekenderdi qorǵaý úshin 17,415 km qorǵanys bógeti turǵyzylyp, 35100 ydysqaptar tóselindi jáne 1264,5 tekshe metr sý aıdaldy.
17 sáýir kúni Nura aýdany Tassýat aýylynda Nura ózenindegi sýdyń kóterilýine baılanysty 14 aýla, sonyń ishinde 10 úı sý astynda qaldy. 56 adam týystaryna jetkizildi. Qutqarý jumystaryna 69 adam men 36 tehnıka jumyldyryldy.
Ótken táýlikte Novostroıka, Yntymaq, Samarka, Nurataldy, Tassýat aýyldarynda 6880 dana ydysqap tóselinip, 3050 m qorǵanys dýaly turǵyzyldy.
Táýlik ishinde sý tasqynyna qarsy is-sharalarǵa 712 adam men 202 tehnıka, sonyń ishinde jergilikti atqarýshy organdar men uıymdardan 332 adam jáne 120 tehnıka, TJD-dan 215 adam, 37 tehnıka, QR Ulttyq gvardııasy 52859 áskerı bóliminen 55 adam, 8 tehnıka, jergilikti polıtsııa qyzmetinen 110 adam, 37 tehnıka tartyldy.
Sý tasqyny jaǵdaıy jiti baqylaýǵa alynǵan.
