Qaraǵandyda eski tehnıkany tapsyryp, aqsha alýǵa da bolady
QARAǴANDY. QazAqparat - Qaraǵandy oblysynda eskirgen tehnıkany tastaıtyn arnaıy konteınerler paıda boldy, dep habarlaıdy QazAqparat tilshisi.
Elektronıka quraldaryna arnalǵan konteınerler Qaraǵandy, Shahtınsk, Saran jáne Abaı qalalarynda ornatyldy. Jumys istemeıtin tehnıkany «Promothod Qazaqstan» JShS paıdaǵa jaratýmen aınalysady. Qabyldaý oryndary jabdyqtalǵaly 3 aı aralyǵynda kompanııa 100 tonnadan astam eski tehnıkany jınap, qaıta óńdeýge jibergen eken. Bul konteınerlerge isten shyqqan shaǵyn kólemdi tehnıkany, mysaly noýtbýk, fotoapparat nemese elektr quraldaryn laqtyrýǵa bolady. Eger tehnıka tońazytqysh nemese teledıdar sekildi kólemi úlken bolsa, onda kompanııa ókilderi olardy úıden ózderi kelip, alyp ketedi. 
«Telefon arqyly qońyraý shalsa bolǵany, bizdiń operator iri tehnıkany shyǵarýǵa ótinim qabyldaıdy. Belgilengen kúni júk tıeýshileri bar kólik kelip, qajeti joq eski tehnıkany shyǵaryp alyp ketedi», - deıdi «Promotxod Qazaqstan» JShS Elektronıka jáne elektr jabdyqtary qaldyqtaryn jınaý jónindegi jetekshi Karına Bentsel.
Konteınerlerden alynatyn eski tehnıka kompanııanyń arnaıy zaýytyna jetkiziledi. Ol jerde tsehtarda bólshekteý jumystary arqarylady. Qara jáne tústi metaldar, plastık, shyny jáne zııandy zattar bólinedi. Ýly qaldyqtar, mysaly, synap dereý tazartylady jáne zararsyzdandyrady.
«Qorshaǵan ortany qorǵaýdan basqa, biz eski tehnıkaǵa jańa ómir beremiz. Mysaly, plastıkti biz usaqtaımyz jáne qaıta óńdelgen materıaldardan jasalǵan buıymdar óndirýmen aınalysatyn kompanııalarǵa jiberemiz. Teledıdar korpýsy plastıkalyq terezelerge arnalǵan jaqsy fýrnıtýra bolýy múmkin», - dedi «Promothod Qazaqstan» JShS dırektorynyń orynbasary Alekseı Petrov
Eski tehnıkany tapsyryp, aqsha alýǵa da bolady. Alaıda ol úshin qaldyqtardy jınaý pýnktterine ózińiz barýyńyz kerek. Tozǵan quraldardyń ár kelisi úshin sizge 20 teńge tólenedi.
Qaldyqtardy jınaý kompanııasy eski elektronıka tastaýǵa arnalǵan konteınerlerdi iri saýda úıleriniń janynda da ornatýǵa daıyn. Ol úshin ǵımarat ıelerine kompanııaǵa ótinish berý kerek. Mamandar arnaıy alańdy tegin jabdyqtap, bokstar ornatyp beredi.
