Qaraǵandyda eski avtokólikterdi qaıta óńdeıtin zaýyt ashyldy
ASTANA. QazAqparat -Qaraǵandyda «Saryarqa» arnaıy ekonomıkalyq aımaǵynda isten shyqqan eski avtokólikterdi qaıta óńdeıtin «RecyclingCompany» JShS zaýyty qurylysynyń birinshi kezeńi iske qosyldy, dep habarlaıdy IDM baspasóz qyzmeti.
Bul joba 2015-2019 jyldarǵa arnalǵan ındýstrıaldy-ınnovatsııalyq damý memlekettik baǵdarlamasy aıasynda júzege asýda.
Saltanatty sharaǵa Qaraǵandy oblysynyń ákimi Erlan Qoshanov, QR Investıtsııa jáne damý birinshi vıtse-mınıstri Alık Aıdarbaev, QR Energetıka vıtse-mınıstri Ǵanı Sádibekov jáne otandyq avtoóndirýshiler men ekologııalyq uıym ókilderi qatysty.
A. Aıdarbaev óz sózinde jobanyń mańyzdylyǵyna toqtalyp, IIDMB ekinshi besjyldyǵynyń negizgi maqsaty eńbek ónimdiligin arttyrý men óńdelgen taýar eksportynyń kólemin ulǵaıtýǵa baǵyttalǵan óńdeý ónerkásibiniń básekege qabiletiligin yntalandyrýǵa basa nazar aýdarý kerektigin eske saldy.
Onyń aıtýynsha, memleket tarapynan qoldaýdyń kóptegen túrleri men tásilderi usynylady (naqty jobalardyń ınfraqurylymy, uzaq merzimdi lızıng pen nesıeleý, jobalaý kompanııalarynyń jarǵylyq kapıtalyna kirý jáne t.b.).
Іsten shyqqan kólikterdi óńdeıtin zaýyttyń Ortalyq Azııada teńdesi joq. Sondaı-aq, Qazaqstannyń qaıta óńdeý salasyndaǵy iri jobalardyń biri bolyp sanalady. Jobany iske asyrýǵa jergilikti bılik jan-jaqty qoldaý bildirdi. Óndiris «Saryarqa» arnaıy ekonomıkalyq aımaǵynda qurylyp otyr.
Bul joba halyqtyń densaýlyǵyn saqtaýǵa jáne qorshaǵan ortany qorǵaýǵa, qaldyqtardyń keri áser etýin qysqartý men aldyn alýǵa baǵyttalǵan.
Jańa zaýyt Indýstrııa 4.0 jáne tsıfrlandyrý talaptaryna jaýap beretin zamanaýı ıtalııalyq qondyrǵylarmen jabdyqtalǵan.
Keshenniń barlyq jumysyn kompıýterlik júıe baqylaıdy. Internettiń kómegimen Ing. BONFIGLIOLI (Italııa) kompanııasynyń dıspetcherlik qyzmetine júginseńiz, oryn alǵan keleńsiz jaǵdaılardy retke keltirý jóninde keńes beredi.
Italııanyń «Bonfiglioli» óndirýshisi shyǵarǵan shrederlik qurylǵy tozyǵy jetken kólikti joıyp, metal retinde qaıta óńdeıdi. Shrederlik keshenniń óndiristik qýaty jylyna 50 myń eski kólikti joıýǵa jetedi. Qurylǵy bir saǵatta 25 avtokólikti metalǵa aınaldyra alatyn múmkindigi bar. Dál osyndaı zamanaýı qurylǵyny búgingi tańda AQSh, Italııa jáne eýropanyń basqada da elderinde keńinen qoldanady.
Qazaqstanda eski avtokólikterdi óńdeıtin alǵashqy zaýyt qurylysyn tolyq aıaqtaý 2017 jyldyń jeltoqsan aıyna josparlanyp otyr. Ekinshi kezeń aıasynda pırrolızdeý qurylǵylaryn ornatyp, óńdeý múmkindigin 98%-ǵa deıin jetkizý kózdelip otyr.
Qaldyqtan alynǵan tústi jáne qara metall qorytpasy aımaqtaǵy mys qorytý kásipornyna jetkiziledi. Osylaısha, ekonomıkanyń ózara baılanysty salalary arasynda mýltıplıkatıvti yqpaly arta túsedi.
Jobanyń jalpy quny shamamen 3,4 mlrd teńge (1, 2 kezeń). 70-ten astam jumys orny ashylady.
