Qaraǵandyda er adam tapanshamen JShS dırektoryn atty

QARAǴANDY. QazAqparat – Qaraǵandy qalasynda er adam tapanshamen JShS dırektoryn atty, dep habarlaıdy QazAqparat Polisia.kz saıtyna silteme jasap.

Qaraǵandy qalasy polıtsııa basqarmasynyń Ortalyq polıtsııa bólimine saýda kásiporyndarynyń birinde janjal shyǵyp, qarý qoldanylǵany týraly habarlama kelip tústi.

Oqıǵa ornyna patrýldik polıtsııa polkiniń jasaǵy shyqty. Onda JShS-niń biriniń 30 jastaǵy dırektory bir kisimen arada janjal shyqqanyn aıtty. Eregis barysynda qaskúnem «Osa» travmatıkalyq tapanshasynan oq atty. Oq jaraqatyn alǵan er adam medıtsınalyq kómekke júgindi, biraq aýrýhanaǵa jatqan joq.

Polıtseıler 29 jastaǵy er adamdy izin sýytpaı ustady. Kúdikti óz kinásin moıyndady. Travmatıkalyq tapansha alyndy. QR Qylmystyq kodeksiniń 287-babymen («Qarýdy zańsyz saqtaý nemese ustaý») qylmystyq is qozǵalǵan. Tergeý amaldary júrgizilýde.