Qaraǵandyda er adam shaǵyn nesıe uıymynyń kassırin órtep jibermek boldy
QARAǴANDY. QazAqparat - Qaraǵandyda qaraqshylar qaladaǵy shaǵyn nesıe uıymdarynyń biriniń kassırine shabýyl jasap, ústine benzın quıyp, jaǵamyz dep qorqytqan, dep habarlaıdy QazAqparat tilshisi.
9 aqpanda saǵat 16.00-de Qaraǵandyda mıkronesıelik uıymdardyń biriniń úı-jaıynda belgisiz eki adam 28 jastaǵy áıel kassırge benzın quıyp jibergen. Qaraqshylar 120 myń teńge somasyndaǵy aqshany ıemdengen.
«Atalǵan fakti boıynsha QR QK 192-baby «Qaraqshylyq» boıynsha qylmystyq is tirkeldi.
Kúdiktilerdi anyqtaý jáne ustaý úshin polıtsııa departamenti apparatynyń eń tájirıbeli qyzmetkerlerinen jedel top quryldy», - dep habarlady Qaraǵandy oblysy PD baspasóz qyzmeti.
