Qaraǵandyda er adam áıeli men 2 jasar qyzyn kepildikke aldy

QARAǴANDY. QazAqparat – Qaraǵandyda «Arlan» arnaıy maqsattaǵy bólimshesiniń qyzmetkerleri birge turatyn áıeli men 2 jasar qyzyn kepildikke alǵan kúdiktini qarýsyzdandyrdy, dep habarlaıdy QazAqparat Polisia.kz-ke silteme jasap.

26 sáýir kúni saǵat 12.00 shamasynda Qaraǵandy qalalyq polıtsııa basqarmasyna qarasty Temirjol polıtsııa bólimine qaladaǵy kópqabatty úılerdiń birinde janjal bolyp jatqany týraly habarlama túsken. Oqıǵa ornyna jedel tergeý toby jiberilip, habarlama rastalǵan.

«Belgili bolǵandaı, 24 jastaǵy er adam birge turatyn 21 jastaǵy kelinshek pen 2 jasar qyzyn pyshaqpen qorqytyp, kúshtep ustaǵan. Alaıda ol eshqandaı shart qoımaǵan. Qaskóımen aradaǵy kelissóz úsh saǵattan astam ýaqyt júrgizildi. Ol sózge esh kónbedi. Kepildiktegi adamdardyń ómirine qaýip tóngendikten, polıtsııa qyzmetkerlerine shuǵyl sheshim qabyldaýǵa týra keldi», – deıdi Qaraǵandy oblystyq Polıtsııa departamenti bastyǵynyń orynbasary Ábil Ábildın.

Tótenshe jaǵdaılar departamentiniń qyzmetkerleri páterdiń esigin buzǵan bette, «Arlan» arnaıy jasaǵynyń qyzmetkerleri birden ishke kirip, kúdiktini qolǵa túsirdi.

Aldyn ala boljam boıynsha, er adam esirtkilik masań kúıde boldy.

Áıel men qyzy zardap shekken joq. Olar daǵdarys ortalyǵyna ornalastyrylyp, psıhologııalyq kómek kórsetilip jatyr.

Atalǵan derek boıynsha Qazaqstan Respýblıkasy Qylmystyq kodeksiniń 126-baby 2-bóligi 3-tarmaqshasyna sáıkes qylmystyq is tirkeldi. Tergeý áreketteri júrgizilip jatyr.