Qaraǵandyda elimiz boıynsha eń iri kóterme-taratý ortalyǵy ashylady

QARAǴANDY. QazAqparat - Qaraǵandy oblysynyń ákimi Erlan Qoshanov «Alfarýh» JShS kóterme-taratý ortalyǵynyń qurylysymen tanysty, dep habarlaıdy óńir basshysynyń saıty.

Bul nysan eldegi jańa úlgidegi eń iri tehnologııalyq alań bolady.

Logıstıka salasyndaǵy zamanaýı kásiporyn «Soltústik – Ońtústik» aǵyndaryn aýyl sharýashylyǵy ónimderimen saýda úshin baılanystyrýǵa múmkindik beredi. Saýda alańynyń ashylýyn jetkizýshiler men tutynýshylar taǵatsyzdana kútýde. Fermerler bul ortalyqta óz ónimderin deldalsyz sata alady. Al qalalyqtar maýsymdyq baǵa ósimine qaramastan arzan jemis-jıdekter men kókónister satyp ala alady.
Aımaq basshysy jobanyń áleýmettik mańyzy bar ekenin atap ótti. Azyq-túlik qaýipsizdigi mindettrin sheshýmen qatar, bul otandyq taýar óndirýshilerdi qoldaý jáne jańa jumys oryndaryn qamtamasyz etýge múmkindik beretin joba.
Erlan Qoshanov ınvestormen qurylysty aıaqtaý jáne nysandy iske qosý máselelerin talqylady.
Esterińizge sala keteıik, kóterme-taratý ortalyǵynyń qurylysyna qalanyń jańa ortalyǵynda aýqymdy jer telimi bólingen bolatyn. Bul aýmaqta ártúrli klımatty jáne qurǵaq qoımalar, túrli temperatýralyq rejimi bar kameralardy qamtıtyn qoıma termınaldary salynǵan. Biregeı kross-doktar – jabyq pavılondar salyndy, onda bir mezgilde 164 júk kólikteri ornalasýy múmkin. Úı-jaılar jeldetiletin jáne jylytylatyn bolady. Alǵashqy bolyp osyndaı júıeni elimizde qaraǵandylyqtar engizdi. Sonymen qatar kóterme jáne bólshek saýda úshin úlken jabyq bazar salynýda.
Joba memlekettik qoldaýǵa ıe boldy. «Bıznestiń jol kartasy» boıynsha ınvestorǵa nesıe berilgen bolatyn. Al qajetti kommýnıkatsııalardy, onyń ishinde temir joldardy júrgizý memleket tarapynan qarjylandyrylady.
«Tsıfrlyq Qazaqstan» baǵdarlamasy sheńberinde fermerler men olardyń ónimderin satyp alýshylar úshin elektrondyq saýda alańy qurylatyn bolady. Jetkizýshilerdiń yńǵaılylyǵy úshin sol jerde kedendik aımaq ashylmaq.