Qaraǵandyda elektr jelisinen shyqqan órttiń sebebi anyqtaldy
QARAǴANDY. QazAqparat – Jeksenbi kúni keshke Qaraǵandy qalasynyń birqatar kóshelerinde elektr qýaty óship qaldy. Apattyń sebebi elektr jelisinde paıda bolǵan órt boldy. Búgin qala ákimi bolǵan jaǵdaıǵa túsinikteme berdi, dep habarlaıdy QazAqparat tilshisi.
23 mamyr kúni keshke Qaraǵandyda elektr jelisinde órt shyqty. Saldarynan Erýbaev, Gogol, Chıjevskıı kósheleri men N.Nazarbaev dańǵylyndaǵy úılerdiń bir bóligi jaryqsyz qaldy.
TJD baspasóz qyzmeti habarlaǵandaı, sarapshylardyń qorytyndysy boıynsha órt qoqystyń janýynan paıda boldy, jalyn keıinnen jelilerdiń tuıyqtalýyna ákep soqqan.
«Jıyrma úshinshi mamyr 21.40-ta Prıgorodnaıa kóshesindegi órt týraly habarlama kelip tústi. Segiz qýma metr joǵary voltty kabel men 30 sharshy metr qurylys qoqysy janyp ketti. 22.22-de órt sóndirildi. Oqıǵa ornynda Qaraǵandy oblysy TJD jeke quramynan 10 adam jáne 2 birlik tehnıka jumys istedi. Qaza bolǵandar men zardap shekkender joq. Órttiń sebebi - ashyq ot kózi» dep habarlady vedomstvoda.
Jaǵdaıǵa qatysty «Qaraǵandy Jaryq» JShS de túsinikteme berdi. Kompanııa ókilderi órtten zardap shekken elektr jelileri qaıta qalypqa keltirilgenin habarlady.
«Prıgorodnaıa, 10 kóshesindegi elektr berý jelileriniń astyna ruqsatsyz qoqys jaǵý saldarynan órt shyǵyp, Gogol, Erýbaev, Chıjevskıı kósheleri jáne Nazarbaev dańǵyly boıynsha ishinara tutynýshylardy energııamen jabdyqtaý ajyratyldy. 2 fıder zaqymdaldy: birinshisi keshe 23 saǵat 30 mınýtta qosyldy, ekinshisi jaqyn arada jumys isteı bastaıdy».
Qala ákimi Ermaǵanbet Bólekbaev Facebook paraqshasynda osy oqıǵaǵa túsinikteme berdi. Qala basshysy órttiń shyǵý sebebin atap ótti.
«Prıgorodnaıa kóshesiniń turǵyndary elektr berý jelileriniń astyndaǵy ruqsat etilmegen qoqys ornyn órtep jiberdi, bul EJ tirekteriniń órtenýine ákeldi. Qazirgi ýaqytta órt sóndirildi, jóndeý brıgadasy tutynýshylardy rezervtik elektrmen jabdyqtaýǵa aýystyrýmen aınalysýda, sondaı-aq elektr berý jelisin qalpyna keltirý boıynsha jumystar uıymdastyryldy. Jaqyn arada energııamen jabdyqtaý qalpyna keltiriledi. Kináliler jaýapqa tartylady. Osyndaı jaǵdaılardyń aldyn alý úshin barlyq qaraǵandylyqtardy otpen muqııat bolýǵa shaqyramyn», - dep jazdy qala ákimi.
