Qaraǵandyda elektr symynan jaraqat alǵan aqqý mert boldy
ASTANA. QazAqparat - Qaraǵandy oblysynyń orman ınspektorlary mert bolǵan syńaryn tastap kete almaǵan aqqýdy qutqardy. Bul týraly QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet Feısbýktegi paraqshasynda jazdy, dep habarlaıdy QazAqparat tilshisi.
«2018 jyldyń 6 qyrkúıeginde Qaraǵandy oblysy Abaı qalasynyń turǵyny Aýmaqtyq orman sharýashylyǵy jáne janýarlar álemi ınspektsııasyna habarlasyp, qala mańynda aqqýǵa uqsas eki qustyń jatqanyn habarlaǵan. Inspektsııa mamandary Qaraǵandy zoobaǵynyń veterınarııa qyzmetimen birge oqıǵa ornyna bardy», - dep jazdy S. Dildahmet.
Oqıǵa ornyna kelgen mamandar qustardyń suńqyldaq aqqýlar ekendigin anyqtaǵan. Aqqýdyń bul túri sırek kezdesetin nemese joǵalý qaýpi bar qustar qataryna jatpaıdy.
«Qos aqqýdyń biri joǵary voltti elektr symyna urynyp, ólgen. Qus tumsyǵyndaǵy tereń jara osyny aıǵaqtaıdy. Ekinshi aqqý mert bolǵan syńarynan tastap kete almaǵan jáne qatty álsiregen. Sebebi, aqqýlar monogamdy (bir nekeli) bolyp sanalady. Tiri qalǵan aqqý Qaraǵandy oblysynyń zoobaǵyna berildi», - deıdi S. Dildahmet.
Vızýaldy tekserý barysynda eki qustan da atý jaraqaty tabylǵan joq.
