Qaraǵandyda elektr poıyzy 35 jastaǵy erkek pen 4 jasar balany qaǵyp ketti
QARAǴANDY. QazAqparat – Qaraǵandy mańaıyndaǵy stansalardyń birinde er adam men 4 jasar bala elektr poıyzynyń astynda qalyp qoıdy. Zardap shekkender aýyr halde aýrýhanaǵa jatqyzyldy, dep habarlaıdy QazAqparat tilshisi.
24 maýsym kúni saǵat 20:00 shamasynda «Maıqudyq-Jańa-Qaraǵandy» beketinde 38 jasar er adam men 4 jasar bala elektr poıyzynyń astyna túsip qalǵan. Zardap shekkender Maqajanov atyndaǵy klınıkaǵa aýyr halde jetkizildi.
«1985 jyly týǵan er adam bas súıek-mı jaraqatymen, mı dińiniń zaqymdanýymen, 2 qabyrǵasy synyp, ókpesi soǵylyp, sol jaq pnevmotorakspen jetkizildi. Jaýyryny synyp, jaraqat shogyn alǵan ol mas kúıinde Maqajanov atyndaǵy klınıkanyń qabyldaý bólimine jetkizildi. Tekserý jáne jaǵdaıdy turaqtandyrý úshin barlyq qajetti em-shara jasaldy. Ol aýrýhananyń jansaqtaý bólimine jatqyzylǵan bolatyn. Búgingi kúni jaǵdaıy turaqty aýyr. 2016 jyly týǵan bala mıy zaqymdanyp, bas súıegi synyp, shuǵyl neırohırýrgııa bóliminde emdelýde», - dep habarlady Qaraǵandy oblysy densaýlyq saqtaý basqarmasynyń baspasóz qyzmeti.
Qaıǵyly oqıǵa Jelilik polıtsııa bólimi sotqa deıingi tergeýdiń biryńǵaı tiziliminde tirkelgen.
«Qaraǵandy-Suryptaý stansasyndaǵy oqıǵada QR QK 344-baby 1-bóliginde kózdelgen quqyq buzýshylyqtyń belgisi bar», - dep túsindirdi QR ІІM kóliktegi polıtsııa departamentiniń baspasóz qyzmeti.
