Qaraǵandyda eldi dúrliktirgen adam ólimi oqıǵasyna qatysty sot isi bastaldy
QARAǴANDY. QazAqparat - Abaı qalasynyń turǵyny sot aldynda astanalyq Erbolat Jaqsygeldındi óltirip, avtomobılin sýǵa batyrdy degen aıyp boıynsha jaýap berdi, dep habarlaıdy «QazAqparat» HAA tilshisi.
Atyshýly qylmys ótken jyldyń 23 qyrkúıeginde oryn aldy. Eki balanyń ákesi Erbolat Jaqsygeldın óziniń avtomobılimen shyǵyp ketip, iz-tússiz joǵalǵan. Uıaly telefonyna kelgen qońyraýlarǵa jaýap bermegen. Týystary quqyq qorǵaý organdaryna onyń joǵalǵandyǵy týraly ótinish jazǵan. Sebebi, ol buryn-sońdy otbasynan uzaq ýaqytqa eskertýsiz ketpegen.
Bir aı ótkennen keıin, 30 qazanda Qaraǵandy oblystyq ishki ister departamentiniń qyzmetkerleri Abaı qalasynyń mańynan sýǵa batqan avtomobıldi kórgen. Polıtseıler kólikti jaǵaǵa shyǵaryp, ishinen Astana turǵynynyń máıitin tabady.
Tergeý barysynda Qaraǵandy oblysynyń polıtseıleri 30 jastaǵy Jeńis Qaıyrjanovty kúdikti retinde tutqyndady. Anyqtalǵandaı, Erbolat Jaqsygeldın Abaı qalasynyń turǵyny Jeńis Qaıyrjanovtyń úıine qonaqqa kelgen. Tergeý nusqasy boıynsha, úıdiń ıesi áıelin qyzǵanǵandyqtan janjal oryn alyp, adam óltirýge sebepshi bolǵan. Qylmysker Astana turǵynyn birneshe ret jaraqattap, saldarynan er kisi qaza tapty.
Sottalýshy qazir mamandandyrylǵan aýdanaralyq sotynyń zalynda qamaýda otyr. Oǵan QR Qylmystyq kodeksiniń 99-baby «adam óltirý» jáne 202-baby «Bótenniń múlkin qasaqana joıý nemese búldirý» boıynsha aıyp taǵyldy.
