Qaraǵandyda eksporttaýshy kásiporyndarmen jumys isteý úshin jedel shtab quryldy

QARAǴANDY. QazAqparat – Qaraǵandy oblysynda álemdegi ahýalǵa baılanysty eksporttaýshy kásiporyndarmen jumys isteý úshin jedel shtab iske qosyldy. Ony óńir ákiminiń orynbasary Ermek Alpysov basqarady. Barlyq týyndaǵan máseleler jedel rejımde sheshiledi, dep habarlaıdy QazAqparat tilshisi.

Bul týraly oblys basshysy Jeńis Qasymbek apparattyq keńeste málimdedi.

«Bizde kóptegen kásiporyndar syrtqy naryqpen tyǵyz baılanysty. Óńirde jedel shtab qurdyq, ótken aptadan bastap ol jedel jumys istep keledi. Biz árbir eksporttaýshy kásiporynmen, barlyq iri jumys berýshilermen kúndelikti baılanysta bolamyz. Jaǵdaıdy monıtorıngileý, eksporttyq ónimdi jóneltýge jáne eńbek ujymdaryndaǵy jaǵdaıǵa baılanysty barlyq máselelerdi sheshýimiz qajet. Bul álemdegi qalyptasqan jaǵdaıǵa baılanysty mańyzdy másele. Eń bastysy – jumys oryndaryn saqtaý, azamattarymyzdyń ál-aýqaty artýda», - dep atap ótti oblys basshysy.

Ol qalalar men aýdandardyń ákimderine búkil ónerkásip kásiporyndarymen tyǵyz jumys isteýdi tapsyrdy.

Sondaı-aq ishki jáne syrtqy saýda kólemderine turaqty monıtorıng júrgizý qajettigin aıtty.

Budan basqa, kompanııalardyń ınvestıtsııalyq belsendiligine erekshe nazar aýdarylatyn bolady.

«Bıyl ınvestıtsııa kólemi 850 mlrd teńge deńgeıinde josparlanyp, 2021 jyldyń nátıjesine qaraǵanda 40 mlrd teńgege ósedi. Bul mindetti biz oryndaýymyz kerek», - dep atap ótti Jeńis Qasymbek.

Oblystyń eki aıdaǵy áleýmettik-ekonomıkalyq damý kórsetkishteri týraly ekonomıka basqarmasynyń basshysy Azamat Muqanov baıandady.

Onyń málimetinshe, ónerkásip ónimi 6,5% ósimmen 760,3 mlrd teńgege óndirilgen.

Óńdeý ónerkásibinde jalpaq bolat prokatyn óndirý – 17,6%-ǵa, bolat óndirý – 7,8%-ǵa, shoıyn óndirý – 4,6%-ǵa, kaltsıı karbıdin óndirý – 2,9%-ǵa ulǵaıdy.

Aýyl sharýashylyǵynda jalpy ónim kólemi 27,1 mlrd teńgeni qurady. Oblysta et jáne sút óndirisi artty.

Qurylysta oń qarqyn saqtalyp otyr. Eki aıda 92,6 myń sharshy metr turǵyn úı paıdalanýǵa berildi, bul 2021 jyldyń sáıkes kezeńimen salystyrǵanda 0,4%-ǵa artyq.

Jalpy, 2022 jylǵa oblys aldynda ekonomıkanyń 3,4% ósýin qamtamasyz etý mindeti tur.

Ónerkásipte 4,3 trln teńge kólemine qol jetkize otyryp, eki paıyzdyq ósim belgilengen.