Qaraǵandyda eki turǵyn saýda úıin jaryp jibermek boldy
QARAǴANDY. QazAqparat - 25 naýryzda 102 telefonyna belgisiz azamattan «Taır» SQ ǵımaratyn jaramyz degen habarlama kelip tústi, dep habarlaıdy QazAqparat tilshisi.
Oblystyq Polıtsııa departamentiniń jedel kezekshisi pýltine qońyraý kelip túsken bette dereý oqıǵa ornyna barlyq shuǵyl qyzmetter jiberilgen. Ǵımarattan 500-ge jýyq adam qaýipsiz jerge kóshirildi. Oqıǵa ornynda jedel tergeý toby men saýda úıiniń kúzet qyzmetiniń qyzmetkerleri alkogoldik mas kúıinde 31 jáne 39 jastaǵy Qaraǵandy qalasynyń eki turǵynyn ustady.
Mán-jaıdy anyqtaý barysynda, er adamdar mas kúıinde kúzet qyzmetkerlerine saýda úıin jaratyny týraly málimdegeni belgili boldy. Alaıda polıtsııa qyzmetkerleri tekserý kezinde ustalǵan adamdardan jarylǵysh zattardy tappaǵan.
Polıtsııa qyzmetkerleri eki er adamǵa qatysty QR ÁQBK 438-baby 1-bólimi jáne 440-baby 3-bólimi boıynsha ákimshilik hattamalar jasady.
Sondaı-aq, polıtsııa departamentiniń qyzmetkerleri keıbir áleýmettik jelilerde jáne Whatsapp messendjerinde bul derek týraly jalǵan aqparat taratylǵanyn habarlaıdy. Polıtsııa jalǵan habar taratqany úshin QR QK 274-baby boıynsha qylmystyq jaýapkershilik qarastyrylatynyn eskertedi.
