Qaraǵandyda eki kópqabatty úı jylýsyz qaldy

QARAǴANDY. QazAqparat – Búgin Qaraǵandyda jańa salynǵan eki kópqabatty úı biraz ýaqyt jylýsyz otyrdy. «Teplotranzıt Qaraǵandy» JShS kezekshi qyzmeti jylý jelilerin tekserý barysynda aqaýdy anyqtaǵan, dep habarlaıdy QazAqparat tilshisi.

Eki jańa úıdiń jylý qubyrlarynda aqaý bary jeke jelilerdi tekserý kezinde belgili boldy. Jylý aǵyp jatqan jerdi anyqtaý úshin «Teplotranzıt Qaraǵandy» mamandary ortalyq jylý júıesin óshirýge májbúr boldy.

«Jylý jelilerin monıtorıngileý kezinde «Teplotranzıt» JShS kezekshi qyzmetimen aqaý anyqtalyp – «Atameken» TK tıesili jeke menshik jelilerde sýdyń ketýi anyqtaldy. «Teplotranzıt» JShS brıgadasymen aqaýlardy joıý úshin tehnıkalyq kómek kórsetilýde. Aqaýlardy shuǵyl anyqtap ári joıý úshin sýdy soryp shyǵarý júrgizilýde, Dúısembekov 83/1 jáne 83/2 mekenjaıy boıynsha eki kóp páterli turǵyn úıdi jylytýdyń ortalyq júıesinen ajyratý júrgizildi. Aqaýlar qysqa merzimde joıylatyn bolady», - dep habarlady Qaraǵandy qalasynyń ákimdigi.

Birneshe saǵattan keıin aqaýlar joıylyp, páterlerge jylý jiberildi.