Qaraǵandyda eki kólik soqtyǵysyp, bir adam kóz jumdy
QARAǴANDY. QazAqparat – Qaraǵandyda eki avtokóliktiń soqtyǵysýy saldarynan 81 jastaǵy er adam kóz jumdy jáne 3 adam zardap shekti, dep habarlaıdy QazAqparat tilshisi.
Apat 24 aqpanda «Qaraǵandy arena» muz saraıynyń janynda bolǵan.
«Mersedes» avtokóliginiń 46 jasar júrgizýshisi Respýblıka dańǵylymen Volochaevskaıa kóshesine qaraı kele jatyp, 36 jastaǵy júrgizýshi tizgindegen «Kıa» avtokóligimen soqtyǵysqan», - dep habarlady Qaraǵandy oblysy PD baspasóz qyzmeti.
Jol-kólik oqıǵasy nátıjesinde «Mersedes» avtokóliginiń 81 jastaǵy jolaýshysy alǵan jaraqatynan oqıǵa ornynda kóz jumdy, eki avtokóliktiń úsh jolaýshysy medıtsınalyq mekemege jetkizildi.
«4 adam zardap shekken. 1 zardap shegýshi jedel medıtsınalyq kómek brıgadasy kelgenge deıin qaıtys boldy. Qalǵan 3 adam prof. H. J. Maqajanov atyndaǵy klınıkaǵa jetkizildi. 1 zardap shegýshiniń jilinshiginde ashyq synyq, bel omyrtqasynyń jabyq synyǵy anyqtaldy. Taǵy 1 zardap shegýshi buǵanasynyń jabyq synyǵymen kelip tústi, 1 zardap shegýshi ambýlatorlyq emdeýge jiberildi», - dedi Qaraǵandy oblysynyń Densaýlyq saqtaý basqarmasyndaǵylar.
Atalǵan derek boıynsha QK 345-babynyń 3-bóligi boıynsha sotqa deıingi tergeý bastaldy. Tıisti saraptamalar taǵaıyndalyp, tergeý júrgizilýde.
