Qaraǵandyda eki boıjetkendi qaǵyp ketken stýdent eki aıǵa tutqyndaldy
QARAǴANDY. QazAqparat - Qaraǵandy soty jyldamdyqty asyryp, jaıaý júrginshiler ótkelinen 20 jastaǵy boıjetkendi qurbysymen qaǵyp ketken JOO-nyń stýdentin eki aıǵa tutqyndady, dep habarlaıdy «QazAqparat» HAA tilshisi.
Qazybek bı aýdandyq sotynyń tóraǵasy Shahatbek Ábdirov tergeýshiniń ótinishi negizinde jolda júrý jyldamdyǵyn shekten tys asyrǵan stýdentke qatysty «qamaýda ustaý» bultartpaý sharasyn sanktsııalady.
Sýdıa stýdentti abaqtyǵa qamaýǵa sebep onyń jasaǵan qylmysynyń aýyr dep tanylýy jáne jol erejesin óreskel buzǵandyǵy ekenin aıtty. Al kúdiktiniń qorǵaýshysy ony bas bostandyǵynan aıyrmaý túrinde shara qoldanýdy surady.
Eske sala keteıik, kólik apaty 15 mamyrda saǵat 21.45-te oryn aldy. BMW júrgizýshisi kóligimen jaıaý júrginshiler ótkelinen ótip bara jatqan eki boıjetkendi qatty jyldamdyqpen qaǵyp ketken. Onyń bireýi oqıǵa ornynda mert bolyp, ekinshisi emhanaǵa jatqyzylǵan bolatyn.
