Qaraǵandyda eki avtobýstyń soqtyǵysýyna kináli júrgizýshi sottalatyn bolady

QARAǴANDY. QazAqparat – Qaraǵandyda eki avtobýs soǵylyp eki adam mert boldy. Atalǵan oqıǵa boıynsha qylmystyq is sottyń qaraýyna jiberildi. Qaıǵyly jaǵdaıǵa 32 jastaǵy avtobýs júrgizýshisi kináli dep tabylǵan, dep habarlaıdy QazAqparat tilshisi.

Esterińizge sala keteıik, ótken jyldyń 25 qarashasynda Qaraǵandyda jantúrshigerlik jol-kólik oqıǵasy boldy.

Mersedes-Bents jolaýshylar avtobýsynyń 32 jastaǵy júrgizýshisi Saran qalasy jaǵynan Qaraǵandy qalasy Bajenov kóshesine qaraı júrip kele jatyp, kópirde qarsy jolaqqa shyǵyp ketken. Saldarynan Yuntong jolaýshylar avtobýsymen betpe-bet soqtyǵysqan.

«Apat saldarynan Yuntong avtobýsynyń júrgizýshisi men Mersedes-Bents avtobýsynyń jolaýshysy oqıǵa ornynda mert boldy. Bes jolaýshy aýyr dene jaraqatyn aldy, on jolaýshy ortasha dene jaraqatyn aldy. Qazirgi ýaqytta osy qylmystyq is boıynsha jol-kólik oqıǵasyna kináli azamatqa qatysty tergeý aıaqtaldy jáne sottyń qaraýyna jiberildi», - dedi Qaraǵandy oblysy PD bastyǵy polıtsııa general-maıory generaan Faızýllın.

Qazirgi ýaqytta qylmystyq is boıynsha aıyptalyp otyrǵan avtobýs júrgizýshisi úı qamaýynda. Onyń kinási moıyndalǵan jaǵdaıda, kem degende 5 jylǵa bas bostandyǵynan aıyrylýy múmkin.

Óz kezeginde oblystyń bas polıtseıi júrgizýshilerge jol qozǵalysy erejelerin, jyldamdyq rejımin jáne qashyqtyqty qatań saqtaý, joldarda óte muqııat jáne saq bolý kerektigin eske saldy. Sondaı-aq, ol kólik quralyn basqarý kezinde qaýipti manevrler jasaý men kúrt toqtaýdan abaı bolý kerek ekenin eske saldy.