Qaraǵandyda eki aptada karantın talaptaryn buzǵan 71 kásiporyn ıesi jaýapqa tartyldy
QARAǴANDY. QazAqparat - Qaraǵandyda quramyna Taýarlar men qyzmetterdiń sapasy men qaýipsizdigin baqylaý departamentiniń ókilderi kiretin mobıldi top pen Jedel áreket etý ortalyǵy bıznes nysandarynyń karantın erejeleriniń saqtalýyn tekserý boıynsha reıdter ótkizýdi jalǵastyrýda.
Qaraǵandy oblysyn ákimdigi resmı saıtynyń habarlaýynsha, 18 shildede mobıldi top BAQ ókilderimen birlesip, Ermekov kóshesi, 33/1 mekenjaıy boıynsha ornalasqan «Spektr» túngi klýbynyń jumys istep turǵanyn anyqtaǵan.
Tekseris kezinde «Spektrdiń» art-alańynda júzden asa jastar bolǵan. Tártip saqshylary men BAQ ókilderin kóre sala, olardyń basym bóligi klýbtan kete bastaǵan.
Alaıda kóńil kóterýshiler arasynda polıtsııaǵa baǵynbaı, BAQ qyzmetkerleriniń jumysyna kedergi jasaǵandar da boldy.
Osylaısha, ishimdik ishken klýb qonaqtarynyń biri LIFE09 ınternet-portalynyń operatorynyń beınekamerasyn judyryqpen uryp, syndyrdy. Ereje buzǵandardyń barlyǵy - shamamen 20 adam - Mıhaılov polıtsııa bólimine jetkizildi.
Sondaı-aq reıd barysynda Buqar-jyraý, 28 mekenjaıy boıynsha ornalasqan «To mesto» kalıan klýby karantınge qaramastan jumys istep turǵany anyqtaldy.
Karantın talaptaryn oryndamaǵan kóńil kóterý oryndarynyń basshylaryna 640 myń teńge kóleminde (230 AEK) aıyppul salynýy múmkin.
Jalpy eseptegende 5-shi shildeden bastap Qaraǵandyda karantın talaptaryn oryndamaǵan 71 kásiporyn ákimshilik jaýapqa tartyldy.
