Qaraǵandyda eki adamnyń ajalyna sebepker bolǵan júrgizýshi qamaýǵa alyndy
QARAǴANLY. QazAqparat - Polıtsııa qyzmetkerleri Toyota Camry-men «VAZ 2107» jáne Mercedes-Benz avtokólikterin qaǵyp, jol kóligi apatyn jasaǵan 26 jastaǵy qaraǵandylyq azamatty ustap, qamaýǵa aldy. Apat saldarynan eki er adam qaza taýyp, eki áıel jaraqat aldy, dep habarlaıdy «QazAqparat» HAA tilshisi.
Jol kóligi apatynyń sebebi anyqtaldy. Toyota Camry-diń jolaýshylar kreslosynda 26 jastaǵy qyz sińilisimen otyrǵan. Júrgizýshi 5 qarashaǵa qaraǵan túni Shahterov dańǵylynan Respýblıka dańǵyly baǵytyna qaraı jyljyp kele jatqan. Aldyn ala málimetter boıynsha kólikti basqara almaǵan júrgizýshi bir baǵytta ketip bara jatqan VAZ 2107-ge soǵylǵan. Ony janamalaı soǵyp ótken Toyota Camry qarsy baǵytqa shyǵyp, Mercedes-Benz-ke soǵylǵan. Aýyr jaraqat alǵan VAZ júrgizýshisi men jolaýshysy apat ornynda kóz jumdy. Ekeýi de 1972 jyly týǵan. Toyota Camry-degi apaly-sińili eki jolaýshy jaraqat aldy. Kórsetilgen medıtsınalyq kómekten keıin olar úılerine qaıtaryldy.
Qaraǵandy oblysy ishki ister departamentiniń baspasóz qyzmetiniń basshysy Baqytjan Qudııarovtyń málimetinshe, QR QK-iniń 345-baby 4-bóliminde kózdelgen «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha qylmystyq is qozǵaldy.
«Kúdikti ýaqytsha ustaý oqshaýlaǵyshyna qamaýǵa alyndy. Qylmystyq is aıasynda tıisti saraptamalar taǵaıyndaldy», - deıdi Baqytjan Qudııarov.
