Qaraǵandyda eki adamdy óltirgen kúdikti ustaldy
26 shilde túngi saǵat 1.30 shamasynda Qaraǵandy qalasyndaǵy kóp qabatty úılerdiń biriniń aýlasynan eki adamnyń máıiti tabyldy. Oqıǵa orynyna birden jedel-tergeý toby jiberildi. Polıtsııa qyzmetkerleri birden oqıǵa bolǵan jerdi zerttep, kúdiktini anyqtaý boıynsha keshendi is-sharalar júrgizildi.
«Jedel áreketter barysynda Qaraǵandy qalalyq Polıtsııa basqarmasy patrýldik polıtsııa polkiniń qyzmetkerleri 23 jastaǵy kúdiktini anyqtap, ustady. Ol jábirlenýshilermen kelispýshilik barysynda pyshaq jaraqatyn salǵany týraly moıyndaý kórsetpe belgilerin berdi. Qylmys quraly tárkilendi. Atalǵan fakti boıynsha Qylmystyq Kodekstiń 99-baby 2-tarmaǵyna sáıkes qylmystyq is qozǵaldy. Polıtsııa qyzmetkerleri jábirlenýshilerdiń jeke basyn anyqtady. Olar - 18 jáne 20 jastaǵy azamattar. Qazirgi ýaqytta tergeý amaldary júrgizilýde», - dep habarlady Qaraǵandy oblystyq Polıtsııa departamenti bastyǵynyń orynbasary Ábil Ábildın.