Qaraǵandyda dombyranyń qulaǵynda oınaıtyn káris bala turady

QARAǴANDY. QazAqparat – Saran qalasynyń óner mektebinde 900-den astam bala ónerdiń túr-túrin meńgerip jatyr. Olardyń arasynda káris ultynyń ókili Artem Kım bar. Ol qazaqtyń ulttyq aspaby — dombyranyń qulaǵynda oınaıdy.

Artem Kım 7 jasynda dombyra shertýdi, kúı tartýdy úırengen. Qosymsha úıirmelerdi tańdatqanda birden óner mektebine barǵan. Bul onyń jan qalaýy. Sodan beri ulttyq aspappen qazaq ónerin dáriptep keledi.

«Dombyra tartqanda ózimdi jeńil sezinemin. Dalanyń keńdigin sezinemin. Alǵash osy aspapty qolyma alǵanda, meniń boıymnan dombyram úlken bolatyn-dy. Saýsaqtarym jetpeıtin», - deıdi Artem Kım

Artemge dombyra shertýdi úıretken ustazy — Ǵabıden Ábjatov.

«Basynda kelgende káris balasy qazaqshaǵa sýdaı ekenine tańǵaldym. Dombyrany sol qolymen ustady. Men sen solaqaısyń ba desem, joq deıdi. Sodan úırettik. Óte uqypty. Maǵan onyń osy qasıeti unady. Sol jyldary Saran qalasy boıynsha dombyra tartqan jalǵyz ózge ult ókili Artem bolatyn», - deıdi dombyra synybynyń oqytýshysy Ǵabıden Ábjatov.

Túri bólek bolǵanymen júregi qazaq dep soqqan ónerpaz ulttyq aspaptyń mańyzy erekshe ekenin sezinedi. Qazir ol on shaqty kúıdi erkin shertedi. Sahnada tartqan ár shyǵarmanyń avtoryn tanyp, tarıhyna mán beredi.

Foto: Artem Kımniń jeke muraǵatynan