Qaraǵandyda dinı ekstremızm men lańkestiktiń aldyn alý máseleleri boıynsha jasóspirimderge arnalǵan semınar ótti
QARAǴANDY. 6 sáýir. QazAqparat - Qaraǵandylyq sýdıalar jasóspirimder úshin «Dinı ekstremızm men lańkestiktiń aldyn alý. Lańkestiktiń jasalǵany týraly kópe-kórneý jalǵan aqparat týraly qylmystyq isterdi qarastyrý» taqyrybynda semınar-dáris uıymdastyrdy.
Bul haqynda Qaraǵandy oblystyq sotynyń baspasóz ortalyǵynan málimdedi.
«Sońǵy jyldary lańkestik máselesi Ortalyq Azııanyń barlyq memleketterin abyrjytyp otyr. Búgingi tańda elimiz lańkestik pen dinı ekstremızmge qarsy belsendi túrde ulttyq ári halyqaralyq deńgeıde kúres júrzizýde. Elbasy óziniń «Qazaqstan 2050: qalyptasqan memlekettiń jańa saıası baǵyty» atty Qazaqstan halqyna arnaǵan Joldaýynda Úkimetke dinı ekstremızm men lańkestikpen kúres boıynsha memlekettik baǵdarlamany ázirleýdi tapsyrdy», - dep atap ótilgen habarlamada.
Lańkestikke qarsy turý úshin onyń týyndaý sebepteri men jaıttaryn sheshken lázim. Sot mamandarynyń paıymdaýlarynsha, sáıkesinshe aldyn alý jáne túsindirý jumystaryn qolǵa alǵan abzal.
Semınar-dáriske Qaraǵandy qalasyndaǵy №2 Oktıabr aýdanynyń soty muryndyq bolyp otyr. Mekteptiń joǵary synyp oqýshylary men ýchılışeniń tálim alýshylaryna dinı-psıhologııalyq-quqyqtyq keńes ortalyǵynyń mamandary men quqyq tanýshylar dáris oqydy.
