Qaraǵandyda densaýlyq saqtaý salasynyń úzdik mamandary marapattaldy
ASTANA. QazAqparat - Búgin kenshiler mádenıet saraıynda densaýlyq saqtaý salasynyń qyzmetkerlerine qurmet kórsetildi. 8 úzdik maman dıplom men oblys ákiminiń syılyǵyn ıelendi, dep habarlaıdy oblys ákiminiń baspasóz qyzmeti.
Saltanatty sharany Qaraǵandy oblysynyń ákimi Erlan Qoshanov ashty.
«Qurmetti medıtsına qyzmetkerleri, búgin biz sizderdi, eń abzal mamandardy ulyqtaý úshin jınalyp otyrmyz. Sizderdiń áriptesterińiz aıtpaqshy, medıtsına - ol mahabbat. Áıtpese onyń máni joq. Múmkin tek osy sebepti kóp ýaqytty mamandyqty úırený úshin oqýǵa jumsap, sonan soń eń mańyzdy zat - adam ómirin saqtap qalýǵa bar kúshterińizdi jumsaısyzdar», - dedi aımaq basshysy.
Sonymen qosa oblys ákimi dárigerlerimizge keıde yńǵaısyz jaǵdaıda jumys isteýge týra keletinin, alaıda soǵan qaramastan olar kásibıliginiń arqasynda árdaıym tyǵyryqtan shyǵar jol taba alatynyn aıtty. Densaýlyq saqtaý salasyndaǵy problemalar birtindep sheshiledi. Aldaǵy josparda oblystyq aýrýhananyń jańa ǵımaratynyń jáne Qaraǵandydaǵy onkologııalyq dıspanserdiń operatsııalyq blogynyń qurylysy tur.
Óz sózin qorytyndylaı kele oblys ákimi densaýlyq saqtaý salasynyń barlyq qyzmetkerlerin kásibı merekesimen quttyqtady: «Memleket basshysy árdaıym ult densaýlyǵy - el bolashaǵynyń negizi ekenin qadap aıtady. Sol bolashaq sizderdiń qoldaryńyzda. Barlyq qaraǵandylyqtardyń atynan medıtsına qyzmetkerlerine alǵysymdy bildirgim keledi. Biz sizderden ǵajaıyp kútemiz, al sizder sol ǵajapty qoldaryńyzben jasaısyzdar. Sizderde shuǵyl jaǵdaılar az, al rıza emdelýshiler kóp bolsyn».
Bıyl oblys ákimi syılyǵynyń laýreaty atanǵandar:
«Úzdik terapevt» nomınatsııasynda - «Temirtaý qalasynyń №1 emhanasy» JTD 2 bólimshesiniń meńgerýshisi Valentına Marchenko;
«Úzdik jalpy tájirıbe dárigeri» - «Nura aýdanynyń ortalyq aýdandyq aýrýhanasy» QMM jalpy tájirıbe dárigeri Jibek Bildenova;
«Úzdik medbıke» - «Saran qalasynyń ortalyq aýrýhanasy» QMM medıtsınalyq bıkesi Irına Shperlıng;
«Úzdik akýsher-gınekolog» - «Balqash qalasynyń ortalyq aýrýhanasy» QMM bólim meńgerýshisi Roza Terlikbaeva;
«Úzdik pedıatr» - «Qaraǵandy qalalyq balalar aýrýhanasy» QMM pedıatr dárigeri Lıýdmıla Elıakına;
«Úzdik hırýrg» - «Oblystyq medıtsınalyq ortalyq» QMM otorınolarıngologııalyq bóliminiń meńgerýshisi Nurlan Kúlmaǵanbetov;
«Úzdik densaýlyq saqtaý uıymdastyrýshysy» - «Qaraǵandy qalasynyń №3 emhanasy» QMM dırektory Sánııa Boranqulova.
Ár laýreatqa 200 myń teńge kóleminde syıaqy berildi.
Qaraǵandy obysy ákiminiń 600 myń teńgeni quraıtyn «Óz isine adaldyǵy úshin» arnaıy syılyǵyn «Professor Maqajanov atyndaǵy oblystyq travmotologııa jáne ortopedııa ortalyǵy» QMM Qaıta qalypqa keltirý jáne reabılıtatsııa ortalyǵynyń jetekshisi Otan Makishev ıelendi. Úzdik mamanǵa syılyqty oblys ákimi ózi tabys etti.
Medıtsına qyzmetkerleriniń kúni Qazaqstanda jyl saıyn maýsymnyń úshinshi jeksenbisinde atalyp ótedi.
Qaraǵandy oblysy ákiminiń syılyǵy 2006-shy jyly Qazaqstan Respýblıkasynyń Prezıdenti Nursultan Ábishuly Nazarbaevtyń densaýlyq saqtaý salasynyń aldyna qoıǵan maqsattary men mindetterin oryndaýda medıtsına qyzmetkerleriniń atqarǵan eńbekterin jáne aımaǵymyzdaǵy osy salanyń damýyndaǵy zor úlesterin baǵalaý belgisi retinde taǵaıyndalǵan bolatyn.
