Qaraǵandyda dári-dármekti qymbatqa jáne retsepsiz satqan 36 dárihana anyqtaldy
QARAǴANDY. QazAqparat - Qaraǵandy oblysynda monıtorıng toptary 324 dárihanany tekserdi. Onyń 36-synda tártip buzýshylyq anyqtaldy. Birqatar tártip buzýshylar jaýapkershilikke tartyldy, dep habarlaıdy QazAqparat tilshisi.
Tekserýshiler dári-dármekterge shekti qunynan 20%-ǵa joǵary baǵa qoıǵan alypsatarlyqtyń jolyn kesti. Sondaı-aq preparattardy retsepsiz bosatý faktileri men zańsyz farmatsevtıkalyq qyzmet jaǵdaılary anyqtaldy.
Ákimshilik quqyq buzýshylyq týraly ister boıynsha 50 materıal qaraldy. Oblystyq taýar men qyzmetterdiń sapasy men qaýipsizdigin baqylaý departamentiniń óndirisinde taǵy 10 materıal bar.
«Bes hattama QR ÁQBK 424-babynyń 1-bóligi boıynsha jeke tulǵalarǵa qatysty jasaldy («Qyzmettiń osy túrine sertıfıkaty jáne (nemese) lıtsenzııasy joq tulǵanyń zańsyz medıtsınalyq jáne (nemese) farmatsevtıkalyq qyzmetpen aınalysýy»). Tártip buzýshylarǵa aıyppul salyndy. Aıyppul mólsheri bes aılyq eseptik kórsetkishti quraıdy.
Qysqartylǵan óndiris tártibinde QR ÁQBK 426-babynyń 1-bólimi boıynsha 24 hattama qaraldy («Farmatsevtıkalyq qyzmet jáne dárilik zattar men medıtsınalyq buıymdar aınalymy salasyndaǵy erejelerdi buzý). Taǵy 6 materıal jeke tulǵalarǵa, 18 shaǵyn kásipkerlik sýbektilerine qatysty qozǵalǵan. Salynǵan aıyppuldardyń jalpy somasy 3 458 610 teńgeni qurady», - dep málimdedi Qaraǵandy oblysynyń Taýarlar men qyzmetterdiń sapasy men qaýipsizdigin baqylaý departamenti.
Mamandandyrylǵan ákimshilik sottarǵa dárihanalarda jáne zańsyz kásipkerlik qyzmette buzýshylyq faktileriniń anyqtalýy boıynsha 8 materıal berildi.
