Qaraǵandyda bıýdjetten 11 mln teńge jymqyrǵan 3 býhgalter sottaldy

QARAǴANDY. QazAqparat - Qaraǵandy oblysynda bıýdjet qarajatyn jymqyrǵan 3 býhgalter sottaldy, dep habarlaıdy QazAqparat.

Jyl basynan beri Qarjy monıtorıngi komıtetiniń Qaraǵandy oblysy boıynsha ekonomıkalyq tergeý departamenti esepshilerge qatysty úsh isti sotqa joldady.

«Sonyń negizinde Buqar jyraý aýdany sotynyń úkimimen senip tapsyrylǵan bıýdjet qarajatyn jeke karta shotyna aýdarý arqyly jymqyryp, jeke maqsatyna paıdalanǵan aýdandyq memlekettik mekemelerdiń 3 býhgalteri sottaldy. Memleketke kelgen zalal kólemi - 11,1 mln teńge» delingen habarlamada.

Eki aıyptalýshy 3 jylǵa sottaldy. Olar bul merzimdi qylmystyq-atqarý júıesiniń ortasha qaýipsiz mekemesinde óteıdi.

Bir sottalýshy jábirlenýshimen tatýlasyp, kelgen 3,3 mln teńge kólemindegi zalaldy tolyq ótegeni úshin qylmystyq jaýapkershilikten bosatyldy.