Qaraǵandyda búldirshin 5 ıne jutyp qoıǵan
QARAǴANDY. QazAqparat – Qaraǵandyda bir jarym jasar qyz ınemen emdeýde qoldanylatyn 5 ıneni jutyp qoıǵan, dep habarlaıdy QazAqparat «Habar 24» saıtyna silteme jasap.
Ata-anasy shashylǵan zattardy kórip, balanyń jaısyz sezingenin baıqaǵan. Dárigerler jedel ota jasady. Hırýrgter úsh ıneni asqazanynan, ekeýin – ash ishekten tapqan. Ota sátti ótip, kishkentaı naýqas aýrýhanadan úıine shyǵaryldy.
Bıyl dárigerler kámelettik jasqa tolmaǵan balalardyń asqazanynan 50 ret tıyn, shege, júzik, batareıka men túımeler alǵan. Dárigerler osy jyly bala asqazanynan ekinshi ret ıne alyp otyr. Buǵan deıin hırýrgtar 14 jastaǵy qyzǵa ota jasaǵan. Ol da abaısyzda ıne jutyp qoıǵan.
