Qaraǵandyda Buqar jyraýdyń 350 jyldyǵyna arnalǵan kórme-baıqaý ótti
ASTANA. QazAqparat - Qaraǵandyda Dostyq úıinde beıneleý óneri jáne sándik-qoldanbaly shyǵarmashylyq kórmesi ashyldy. Ol tanymal jyrshy, memleket qaıratkeri Buqar jyraý Qalqamanulynyń 350 jyldyǵyna arnalady, dep habarlaıdy oblystyq ákimdiktiń baspasóz qyzmeti.
Sharany Buqar jyraý aýdanynyń ákimdigi, oblystyq Qazaqstan halqy assambleıasy men «Oblys ákimi apparatynyń «Qoǵamdyq kelisimi» KMM uıymdastyrdy.
«Bul sharanyń maqsaty - óskeleń urpaqqa uly jyraýdyń shyǵarmashylyǵyn nasıhattaý bolyp tabylady. Mundaı kórme-baıqaý alǵash ret ótkizilip otyr, alaıda biz ony bes jylda bir uıymdastyryp otyrýdy josparlap otyrmyz», - dedi Botaqara kentiniń óner mektebiniń muǵalimi, kórmeni uıymdastyrýshylardyń biri Amantaı Ákishev.
Baıqaý-kórmege óz týyndylaryn 23 sýretshi usynǵan. Kórermender nazaryna salynǵan jádigerlerdiń jalpy sany - 47. Qatysýshylardyń jas mólsheri 25-ten 70-ke deıingi aralyqta.
Qazylar alqasynyń múshereli aıtýynsha, barlyq jumystar ózinshe bir erekshe týyndy, jánede olardyń arasynan eń úzdigin tańdaý qıynǵa soqqan.
«Baıqaýǵa jas ta, tájirıbeli, tanymal sýretshilerdiń týyndylary da salyndy. Barlyq qatysýshylar jaqsy daıyndalǵan eken, olarǵa alǵysymyz zor. Olar Buqar jyraýdyń beınesin jáne sol kezdegi halqymyzdyń turmysyn beıneleýi tıis edi. Bizge úzdik jumystardy tańdaý qıyn boldy», - dedi qazylar alqasynyń tóraǵasy, QR sýretshiler Odaǵynyń múshesi, QR Eńbek sińirgen qaıratkeri Beıbit Mustafın.
Jeńimpazdarǵa dıplomdar men aqshalaı syılyqtar, al basqa qatysýshylardyń barlyǵyna alǵys hattar tabys etildi.
Baıqaý-kórme QR Prezıdenti Nursultan Nazarbaevtyń «Bolashaqqa baǵdar: Rýhanı jańǵyrý» baǵdarlamalyq maqalasynyń aıasynda ótkizilip otyr.
