Qaraǵandyda brazılııalyq djıý-djıtsý jáne grepplıng týrnırine 330 sportshy qatysady - Qumarov
ALMATY. QazAqparat - Qaraǵandyda ótetin Brazılııalyq djıý-djıtsý jáne grepplıngten IBJJF erejeleri boıynsha «Karaganda open» ashyq halyqaralyq týrnırine 330 sportshy qatysady. Bul týraly búgin Almatyda ótken baspasóz maslıhatynda Qazaqstandaǵy Brazılııalyq djıý-djıtsý jáne grepplıng federatsııasynyń prezıdenti Tólegen Qumarov aıtty, dep habarlaıdy QazAqparat tilshisi.
«Qaraǵandyda týrnır 18-20 naýryz aralyǵynda ótedi. Jarystyń alǵashqy kúninde, ıaǵnı 18 naýryzda 9 jas pen 17 jas aralyǵydaǵy balalar men jasóspirimder saısady. Barlyǵy 144 bala qatysady bul saıysqa. 19 naýryz kúni grepplıng boıynsha eresekter arasynda ótedi. 20 naýryz kúni sportshylar kımonodaǵy «gi» erejesi boıynsha brazılııalyq djıý djıtsýdan saıysady», - dedi Tólegen Qumarov.
Sonymen qatar, ol Qaraǵandydaǵy jarysqa Qazaqstannyń ońtústigi, soltústigi, shyǵysy men ortalyq aımaqtaryndaǵy sportshylar qatysatynyn aıtty.
«Osydan keıin, kúzde Aqtóbede elimizdiń batys aımaqtaryndaǵy sportshylar arasynda týrnır ótkizýdi josparlap otyrmyz. Biz saıystardy óz kúshimizben uıymdastyryp kelemiz. Bul 15-shi týrnır. Saıystarǵa ákimder, bılik ókilderi tarapynan eń bolmasa marapattaý rásimine kelip, sportshylarǵa qoldaý kórsetse degen tilegimiz bar», - dedi Tólegen Qumarov.
