Qaraǵandyda bosandyrý máselesimen aınalysatyn ahýal ortalyǵy ashylady
Qaraǵandy oblysy densaýlyq saqtaý basqarmasynyń basshysy Erjan Nurlybaev onlaın rejımde ótken apparattyq keńeste ana ólimin azaıtý sharalary týraly aıtyp berdi.
«QR Úkimetiniń keńeıtilgen otyrysynda Memleket basshysy júkti jáne bosanǵan áıelderge medıtsınalyq kómek kórsetý boıynsha ózekti máselelerge nazar aýdardy. Biz 2021 jylǵa arnalǵan jospar ázirledik, ony iske asyrý ana óliminiń kórsetkishin tómendetýge múmkindik beredi. Birinshisi - kadr tapshylyǵyn, onyń ishinde reanımatolog-anestezıolog, akýsher-gınekologtardyń jetispeýshiligin joıý qarastyrylǵan. Ekinshi - dárigerler men orta býyn medıtsına qyzmetkerleriniń kásibı deńgeıin arttyrý. Úshinshisi - bosandyrý qyzmetiniń ınfraqurylymyn odan ári jańǵyrtý» dep habarlady baıandamashy.
Rezıdentýraǵa oqýǵa 60 jas maman jiberý josparlanǵan.
Erjan Nurlybaev oblystyq klınıkalyq aýrýhanada biliktilik ortalyǵyn ashý qajettigin atap ótti.
Onyń bazasynda dárigerler men medbıkeler klınıkalyq tájirıbemen aınalysatyn bilikti tálimgerlerdiń basshylyǵymen bilim ala alady.
Ortalyq zamanaýı sımýlıatormen jabdyqtalady.
«2021 jyly oblystyq perınataldyq ortalyqtyń ǵımaraty jóndeledi. Jezqazǵanda perzenthana bólimshesin kópsalaly aýrýhana ǵımaratyna kóshirý josparlanýda. Kelesi qadam - aǵymdaǵy jyldyń naýryz aıynda oblystyq klınıkalyq aýrýhana bazasynda konsýltatıvtik-dıagnostıkalyq ortalyqtyń ashylýy. Munda fertıldi jastaǵy áıelderge keshendi qyzmet kórsetiledi. Sonymen qatar, júkti áıelderdiń densaýlyǵyn baqylaý jáne kúrdeli jaǵdaılarda jedel áreket etý maqsatynda KDO-da bosandyrý máseleleri boıynsha ahýaldyq ortalyq jumys isteıtin bolady», - dedi basqarma basshysy.