Qaraǵandyda bos jer telimderi belgilengen elektrondy karta qurý jumystary bastaldy
ASTANA. QazAqparat - Qaraǵandyda bos jer telimderi kórsetilgen elektrondy karta jasaý jumystary bastaldy,dep habarlaıdy oblys ákimdiginiń resmı saıty.
Osyndaı qoljetimdi málimet bazasyn kásipkerler burynnan beri kútken bolatyn. Aımaqtaǵy shaǵyn jáne orta bıznesti damytýǵa, ınvestıtsııalardy jumyldyrý úshin ne qajet ekeni týraly apparattyq jınalysta oblys ákiminiń orynbasary Almas Aıdarov málim etti.
«Investıtsııalar men shaǵyn jáne orta bıznestiń damýy aımaǵymyzdyń ósýiniń negizi bolyp tabylady», - dep atap ótti ol.
«Investorlar tarapynan oblysymyzǵa degen qyzyǵýshylyq bar. Ótken aptanyń ózinde-aq biz tórt sheteldik jáne eki otandyq ınvestorlarmen kezdesý ótkizdik. Olarmen aspap, kabel zaýytynyń qurylysy jáne taǵy da basqa jobalardy júzege asyrý týraly áńgimelestik», -dedi Almas Aıdarov.
Áleýetti ınvestorlarmen jumys barysynda memlekettik organdardyń jáne múddeli qurylymdardyń durys úılestirilýin kúsheıtý kerek dep esepteıdi oblys ákiminiń orynbasary. Sonymen qatar óńirde ınvestorlardy izdestirý boıynsha naqty júıe qurý kerek.
- Investorlar úshin jaıly jaǵdaı jasaý - birinshi kezekte turǵan másele. Bızneske kómek kórsetý únemi túrde jalǵasyp otyrýy qajet, - dedi oblys ákimi Erlan Qoshanov, orynbasarynyń baıandamasyn tyńdap bolǵan soń.
Aımaq basshysy jaqyn arada kásipkerlik máseleleri boıynsha Keńestiń kezekti jınalysyn uıymdastyryp, ǵalymdar men bıznesmenderden turatyn Ǵylymı-tehnıkalyq keńes jınaýdy tapsyrdy.
