Qaraǵandyda bopsalaýmen aınalysqan jalǵan polıtseı ustaldy
QARAǴANDY. QazAqparat - Qaraǵandyda ózin polıtsııa qyzmetkeri dep tanystyryp, aqsha bopsalaýmen aınalysqan 29 jastaǵy er adam ustaldy.
«Jedel-izdeý sharalarynyń barysynda oblystyq ІІD-niń jeke qaýipsizdik basqarmasynyń qyzmetkerleri aqsha bopsalaýmen aınalysqan jalǵan polıtseıdi, sondaı-aq onyń sybaılastaryn ustady. Qaraǵandynyń buryn sottalǵan 29 jastaǵy turǵyny bopsalaý kestesin qurǵan.
Sybaılastarynyń kómegimen áleýmettik jelilerdiń birinde boıjetkenniń atynan paraqsha quryp, onda er adamdarmen hat almasyp, jynystyq qatynastarǵa túsýdi usynǵan», - dep habarlady oblystyq ІІD-niń baspasóz qyzmetinen.
«Qarmaqqa» Temirtaý qalasynyń 38 jastaǵy turǵyny tústi. Quqyq qorǵaý organdarynyń aqparatynsha, ol jańadan tanysqan boıjetkenmen kezdesý úshin jaldamaly páterge kelgen. Kóp uzamaı páterge ózderin quqyq qorǵaý qyzmetkerleri dep tanystyryp, ony kámelettik jasqa jetpegen qyzǵa qatysty azǵyndyq áreketteri úshin aıyptaǵan birneshe adam keldi. Bul rette jalǵan qyzmettik kýálik kórsetilip, jalǵan kýágerlerdiń qatysýymen tintý ótkizildi.
Polıtsııanyń málimetterinshe, jábirlenýshi qylmystyq jaýapkershilikten bosatylý úshin bopsalaýshylarǵa 60 myń teńge berdi, olar bolsa, er adamnan taǵy 5 myń dollar berýdi talap etken.
Er adam oblystyq ІІD-niń jeke qaýipsizdik basqarmasyna ótinish jazǵan soń, onyń qyzmetkerleri jedel-tergeý sharalarynyń keshenin ótkizdi.
«Kúdikti aqshany berý kezinde ustaldy. Qazirgi ýaqytta bir top adamdarǵa qatysty qylmystyq is qozǵaldy, sot aldyndaǵy tergeý amaldary júrgizilip jatyr. Ustalǵandardyń barlyǵy ýaqytsha qamaýǵa alyndy», - dep qosyp ótti oblystyq ІІD-niń baspasóz qyzmetinen.
