Qaraǵandyda bólim komandıriniń kómekshisine para aldy degen aıyp taǵyldy
QARAǴANDY. QazAqparat - Qaraǵandyda áskerı sardar iri kólemde aıyppul tólep, qyzmetinen aıyryldy, dep habarlaıdy QazAqparat.
«Jandos Bapıevti QR QK 365 baby, 1 bólimi boıynsha (para alý isine deldal boldy) kináli dep taýyp, oǵan jaza retinde alynǵan paranyń 10 ese úlken kóleminde aıyppul salynsyn»,-delingen Qaraǵandy garnızonynyń áskerı sýdıasy Esen Jumabekov shyǵarǵan úkimde.
Buǵan qosa sottalǵan azamat QR Qarýly Kúshterinde memlekettik qyzmette jáne jergilikti atqarýshy organdarda ómir boıyna qyzmet ete almaıtyn boldy. Sondaı-aq sot ony «maıor» áskerı ataǵynan aıyrdy.Aıyppul tóleýge sot úkimi shyqqannan soń bir aı ýaqyt beriledi. Aıyppul tólenbegen jaǵdaıda bas bostandyǵyna aıyrý jazasy beriledi.
Osy iske qatysty materıaldarǵa qaraǵanda, 37 jasar áskerı qyzmetker sybaılas jemqorlyq áreketine jol bergen. Ol QR Qorǵanys mınıstrliginiń bólim komandıriniń quqyqtyq jumystar jónindegi kómekshisi qyzmetin atqaryp kelgen. Para alýǵa ony burynǵy áriptesi kóndirgen. Áskerılerdiń turǵyn úı-turmystyq jaǵdaılaryn tekserý kezinde qyzmet páterleriniń birinde bóten adamdardyń turyp jatqany belgili bolǵan. Osy faktini jasyrý úshin aqshalaı syılyq talap etilgen.
Bapıev bolsa osy áreketke deldal bolyp, tekserýshige berý úshin 150 myń teńge kóleminde para alǵan.
