Qaraǵandyda blokposta turǵan sarbazdarǵa ystyq tamaq taratyldy

QARAǴANDY. QazAqparat – Elimizdegi bolǵan sońǵy jaǵdaılarǵa baılanysty polıtsııa qyzmetkerleri men Qorǵanys mınıstrliginiń sarbazdary Qaraǵandy qalasynyń mańyna qoıylǵan blokpostarda kúzette tur. Bir aptaǵa jýyq ýaqyt úı kórmeı, qystyń sýyǵyna qaramastan óz mindetin atqaryp jatqan kúsh qurylymyna qazaqstandyqtar barynsha qoldaý kórsetip jatyr, dep habarlaıdy QazAqparat tilshisi.

Oblys ortalyǵy Qaraǵandynyń aınalasyna jalpy sany 8 blokpost qoıyldy.

Qaraǵandy men Temirtaýdyń arasyndaǵy blokposta turǵan sarbazdar men polıtsııa qyzmetkerlerine Ánet baba meshitiniń ımamdary men kásipkerler birigip ystyq as taratty.

Dalada -17 gradýs aıaz. Aqyryn soqqan jeldiń ózi betti qarıdy.

Blokposta turǵan polıtseıler men qarýly sarbazdar Qaraǵandy qalasyna kirip jatqan ár kólikti toqtatyp, qujat pen júksalǵyshty tekserip jatyr.

Ánet baba meshitiniń ımamdary kásipkerlermen birlesip qaqaǵan qysqa qaramaı beketti kúzetip turǵandarǵa ystyq shaı men ystyq tamaq ákeldi.

«Barshamyzǵa belgili, qazirgi tańda quqyq qorǵaý organdarynyń qyzmetkerleri men áskerı qyzmetshiler neshe kúnnen beri úıin, týǵan-týysyn kórmeı qyzmet atqaryp jatyr. Halqymyzdyń tynyshtyǵy úshin arpalysyp jatqan baýyrlarymyzǵa Qazaqstan Dinı basqarmasynyń atynan múftıden bastap, oblystaǵy kóptegen ımamdar osyndaı qaıyrymdylyq aktsııasyn uıymadstyrdy», - deıdi oblystyń bas ımamy Ómirzaq qajy Bekqoja.

Qaıyrymdy isti uıymdastyrýshylar bul áli bastamasy ǵana deıdi. Óńirimizdiń kásipkerleri men turǵyndary ıgi sharadan tys qalmaıtynyna senimdi ekenin aıtady.

Din ókilderimen qatar búkil janashyr qazaqstandyqtardyń bastamasyn qoldaý úshin Qaraǵandy qalasynyń qoǵamdyq keńesi QR ІІM Ulttyq ulanynyń áskerı qyzmetshilerine ystyq tamaq ákeldi.

Qazirgi ýaqytta olar táýlik boıy turǵyndardyń tynyshtyǵyn kúzetip tur.

Aktsııa barysynda muqtaj kópbalaly analar men jalǵyzbasty qaraǵandylyqtar nazardan tys qalǵan joq.

Ystyq tamaqty tasymaldaý Qaraǵandy qalasynyń Іshki ister organdarynyń, sondaı-aq áleýmettik qamsyzdandyrý salasyndaǵy ýákiletti organnyń basshylyǵymen kelisildi.