Qaraǵandyda bıyl jańa emhana ashylady
KARAǴANDY. QazAqparat - Qaraǵandy jáne Temirtaý qalalarynda bıylǵy jyly emhanalyq qyzmet kórsetetin úsh nysannyń qurylysy bastalady, sondaı-aq oblys ortalyǵynyń «Vostok-2» yqsham aýdanynda jańa emhana paıdalanýǵa beriledi, dep habarlaıdy QazAqparat tilshisi.
2019 jyly óńirde 11 joba iske asyrylady, onyń ishinde memlekettik-jekeshelik áriptestik mehanızmin qoldaný da qarastyrylǵan.
Qaraǵandy oblysynda ambýlatorlyq-emhanalyq uıymdar jelisin damytý jáne jańǵyrtý sharalar jospary boıynsha atqarylyp jatqan jumystar jaılynda oblystyq densaýlyq saqtaý basqarmasynyń basshysy Erjan Nurlybaev aıtyp berdi.
«Jezqazǵanda aýrýhana qalashyǵyn qalpyna keltirý jumystary aıaqtalady, onyń aýmaǵynda qazirgi zamanǵy medıtsınalyq jabdyqtarmen jabdyqtalǵan keńes berý-dıagnostıkalyq ortalyq qurylady. Shahtınskide aýrýhanalyq qalashyqty jóndeý jumystary jalǵasýda. Nátıjesinde emhananyń jalpy aýmaǵy 1,5 myń sharshy metrden asatyn bolady», - dedi Erjan Nurlybaev.
Onyń aıtýynsha, Maqajanov atyndaǵy kópsalaly aýrýhanada jańa keńes berý-dıagnostıkalyq ortalyq qurý qyzmet sanyn 20% - ǵa arttyrýǵa múmkindik bermek. Ol emdelýshiler men medıtsınalyq qyzmetkerlerge qolaıly jaǵdaı jasaýǵa ýáde berdi.
Basqarma basshysynyń málimetinshe, aýyl turǵyndary da nazardan tys qalmaıdy. Jańa otbasylyq-dárigerlik ambýlatorııa qurylysy boıynsha jumystar júrgizilýde.
Oblysta qyzmettik turǵyn úı bólý arqyly medıtsına mamandarynyń tapshylyǵy máselesi sheshilýde.
áShahtınsk, Abaı, Qaraǵandy jáne Jezqazǵandaǵy dárigerlerge bıyl jıhazben jáne turmystyq tehnıkamen jabdyqtalǵan 69 páter kiltin tapsyrý kózdelip otyr», dedi Erjan Nurlybaev.
Qaraǵandy oblysynda 45 BMSK (Bastapqy medıtsınalyq-sanıtarııalyq kómek kórsetý tártibi - avt.) uıymy jumys isteıdi, onyń 17-i jeke menshik mekeme.
