Qaraǵandyda bıyl birneshe kóshe jańǵyrtylady
QARAǴANDY. QazAqparat - Qaraǵandy qalasynyń ákimi Nurlan Áýbákirov shahar turǵyndaryna bıyl qandaı jańa joldar salynatyny jáne qaı kóshelerde kúrdeli jóndeýler júrgiziletini týraly aıtyp berdi, dep habarlaıdy QazAqparat tilshisi.
Qaraǵandyda 2017 jyly jańa Prıkanalnaıa kóshesiniń qurylysy bastalǵan. Ol Táttimbet kóshesi men Respýblıka dańǵylyn qosady. Jańa kóshe gúlzar ispettes salynyp jatyr, onda jaıaý júrginshiler joldary, velosıped joldary jasalyp, sham baǵanalary ornatylǵan. Joldyń ekinshi bóligi osy jyly aıaqtalady dep josparlanǵan.
Sonymen qatar qala basshylary aǵymdaǵy jyly taǵy bir kósheniń qurylysyn bastaýdy kózdep otyr. Bul jańa kóshe de respýblıka dańǵyly men Táttimbet kóshesin qosatyn bolady. Onyń uzyndyǵy 1,7 shaqyrymdy quraıdy.
Qalanyń Oktıabr aýdany da nazarsyz qalmaıdy. 14-yqshamaýdanda bıylǵy jyly jańa aınalma jol salynbaq. Ol Maıqudyq pen «shyǵys aınalyp ótý jolyn» ózara baılanystyrady.
Al tozǵan joldardyń kúrdeli jóndeýine toqtalar bolsaq, osy jyly Qurylysshylar dańǵylyn qalypqa keltirý josparlanǵan. Ótken jyly bul kósheniń boıyndaǵy káriz júıeleri tolyqtaı aýystyryla bastalǵan. Qazirgi tańda kóshe boıynda nóser aǵyn kárizi jasalyp jatyr. Ol jumystar bıylǵy jyly tolyqtaı aıaqtalady.
Kúrdeli jóndeýler qazirgi árekettegi joldarda da júrgiziledi. Osylaısha, uzyndyǵy 10 shaqyrymdy quraıtyn K.Marks jáne Magnıtogorskaıa kóshelerindegi joldar tolyqtaı qalypqa keltiriledi. Bul jumystardy 2021 jylǵa deıin aıaqtaý kózdelip otyr. Sonymen qatar, uzyndyǵy 8,8 shaqyrym jetinshi magıstral (Saran shossesinen bastap Táttimbet kóshesine deıin) jolynda kúrdeli jóndeý ótkizilip, ony 2020 jylǵa deıin aıaqtaý josparlanýda. Sol jyly Táttimbet kóshesindegi M-14 qıylysyn qalypqa keltirý aıaqtalady.
