Qaraǵandyda bıyl 18 emhana salynady
QARAǴANDY. QazAqparat - Qaraǵandy qalasy jańa medıtsınalyq mekememen tolyqty. Memlekettik-jekeshelik áriptestik aıasynda qalada otbasylyq densaýlyq ortalyǵy ashyldy, dep habarlaıdy QazAqparat tilshisi.
Ortalyq zamanaýı jabdyqtarmen jabdyqtalǵan. Bul jerde emdelýshilerdi jalpy tájirıbe dárigerleri qabyldaıdy. Jańa medıtsınalyq nysanda emshara jáne egý kabınetteri, shuǵyl kómek kórsetý jáne aldyn alý kabıneti bar. Patsıentterge yńǵaıly bolýy jáne uzyn-sonar kezekterdiń bolmaýy úshin barlyq qajetti jaǵdaılar uıymdastyrylǵan.
Jańa densaýlyq saqtaý mekemesinde oblys ákimi Erlan Qoshanov bolyp qaıtty. Óńir basshysy medıtsınalyq qyzmetterdiń qoljetimdiligi men sapasyn jaqsartýdyń mańyzdylyǵyn atap ótti. Bul maqsatta oblysta arnaıy jospar ázirlengen. Bıylǵy jyly 18 shaǵyn emhana ashý kózdelip otyr: jeteýi Qaraǵandy qalasynda, al qalalar men aýdandarda - 11. Maıqudyqta osy emhanalardyń bireýiniń qurylysy bastaldy.
Nysandy salyp jatqan ınvestorlardyń aıtýynsha, memleket tarapynan olarǵa qajetti kómek kórsetilýde.
Qurylys alańyn aralaý kezinde óńir basshysy medıtsınalyq ortalyqqa baratyn qoǵamdyq kólikterdiń jaqsy júrýin uıymdastyrýdy jáne kirme joldy jóndeý máselelerin sheshýdi tapsyrdy.
Al ınvestorlar bolsa, óz esebinen emhana aýmaǵyn kórkeıtýge ýáde beredi. Emhanaǵa 21 myńnan astam adam tirkeledi dep josparlanýda.
«Bizdiń aýdanda qarttar men balalar kóp. Biz osy emhananyń ashylýyn asyǵa kútemiz, qurylysty qadaǵalaımyz. Dárigerlerge qaralý úshin alysqa barmaıtynymyz qýantady. Meniń anamnyń aıaǵy aýyrady, árdaıym emhanaǵa barý úshin taksı shaqyrýǵa týra keledi», - dedi shaǵyn aýdannyń turǵyny Tatıana Zılıpýkına.
Jańa emhana jeltoqsan aıynda ashylady dep josparlanýda. Erlan Qoshanov áleýmettik nysandy merziminde qoldanysqa berýdi tapsyrdy.
