Qaraǵandyda bir jasar sábı terezeden qulap ketti
QARAǴANDY. QazAqparat – Qaraǵandyda ekinshi qabatta ornalasqan páterdiń terezesinen bir jasar sábı qulap ketti. Kishkentaı qyzǵa ota jasaǵan, dárigerler onyń jaǵdaıyn ortasha aýyr dep baǵalap otyr, dep habarlaıdy QazAqparat tilshisi.
1 maýsym kúni saǵat 12:00-de Qaraǵandyda 2019 jyly týǵan sábı ekinshi qabattaǵy páterdiń terezesinen qulap, aýrýhanaǵa jetkizildi.
«2019 jyly týǵan bala H.J.Maqajanova atyndaǵy Kópbeıindi aýrýhananyń jaq-bet hırýrgııasy bólimine jatqyzyldy. Tómengi jaqtyń eki jaǵyndaǵy súıek ashyq synǵan. Shaqalaq kelip túskennen keıin ota jasaldy. Qazirgi ýaqytta jaǵdaıy turaqty. Ortasha aýyr deńgeıde», - dep habarlady Qaraǵandy oblysy densaýlyq saqtaý basqarmasynyń baspasóz qyzmeti.
TJD habarlaǵandaı, bul – Qaraǵandy oblysyndaǵy bıylǵy jyldyń sáýir aıynan bergi balalardyń terezeden qulaýynyń 9-shy oqıǵasy. Buǵan deıin mundaı oqıǵalar Qaraǵandy, Balqash, Temirtaý, Jezqazǵan, Shahtınsk qalalary men Saryshaǵan kentinde bolǵan.
Qutqarýshylar balalardy qaraýsyz jáne ashyq tereze aldynda jalǵyz qaldyrmaýdy eskertedi.
