Qaraǵandyda bir kúnde eki bala men eki eresek kisi kólik astyna túsip qaldy
QARAǴANDY. QazAqparat – Qaraǵandyda bir kúnde jaıaý júrginshilerdiń qatysýymen tórt jol-kólik oqıǵasy tirkeldi. Barlyq zardap shekkender aýrýhanaǵa jetkizildi, dep habarlaıdy QazAqparat tilshisi.
2 aqpan saǵat 11.35 shamasynda Toyota avtokóliginiń 46 jastaǵy júrgizýshisi Gogol kóshesimen kele jatyp, rettelmeıtin jaıaý júrginshiler ótkelinde 59 jastaǵy áıeldi qaǵyp ketti. Saldarynan áıel jaraqat aldy.
Sol kúni 13.50 shamasynda qala mektepteriniń biriniń janynda 37 jastaǵy júrgizýshiniń basqarýyndaǵy Mercedes markaly avtokólik rettelmeıtin jaıaý júrginshiler ótkelinde 8 jasar qyzdy qaǵyp ketti.
Dál osy kúni taǵy bir júrgizýshi balany qaǵyp ketti. Shamamen 15.30-da 38 jastaǵy Chevrolet júrgizýshisi 8 jasar balany qaǵyp ketken.
Bala baǵdarshamnyń tyıym salynǵan sıgnalyna qaramastan joldyń júris bóligin kesip ótken.
Al 19 jastaǵy jas jigit baǵdarshamnyń jasyl sıgnalyna ótkenine qaramastan, ony shamamen 16.50-de Molokov kóshesiniń boıynda 48 jastaǵy Toyota Land Cruiser Prado jol talǵamaıtyn kóliginiń júrgizýshisi qaǵyp ketken.
Barlyq jaǵdaıda jaıaý júrginshiler ártúrli dárejede jaraqat alyp, medıtsınalyq mekemelerge jetkizildi.
Faktiler polıtsııada tirkelgen.
Tıisti saraptamalar taǵaıyndaldy, onyń nátıjesi boıynsha sheshim qabyldanady.
«Biz jol qozǵalysyna qatysýshylarǵa jol qozǵalysy erejelerin múltiksiz saqtaý týraly ótinish bildiremiz jáne barynsha muqııat jáne saq bolýǵa shaqyramyz. Júrgizýshilerge JKO boldyrmaý úshin aýa raıyna sáıkes jyldamdyq rejımin tańdaýǵa, belgilengen qashyqtyqty saqtaýǵa keńes beremiz. Sondaı-aq, manevr jasaý erejelerin buzbańyzdar degimiz keledi. Jol berýdi qajet etetin jaıaý júrginshiler týraly umytpańyzdar. Jaıaý júrginshilerge qystyń bastalýymen júrgizýshilerge kólik quralyn basqarý qıynǵa soǵatynyn eske salamyz jáne kele jatqan kóliktiń aldynda joldan ótpeýlerin ótinemiz. Sebebá qyz aılarynda avtokólik birden toqtaı almaıdy», - deıdi Qaraǵandy oblysy PD jergilikti polıtsııa qyzmeti basqarmasynyń bastyǵy Qýanysh Zarýbaev.
