Qaraǵandyda bir kúnde birneshe urlyq jasaǵan qaraqshylar ustaldy
QARAǴANDY. QazAqparat - Qaraǵandy polıtseıleri bir kúnniń ishinde onshaqty ret urlyq jasaǵan eki qaraqshyny ustady, dep habarlaıdy QazAqparat tilshisi.
Qaraǵandy oblysy ІІD-de málim etkendeı, bıylǵy jyldyń 28 shilde kúni polıtsııaǵa Qaraǵandy oblysynyń turǵyny habarlasqan. Ol aryzynda belgisiz bireý úıine tereze arqyly enip, 600 myń teńge kóleminde múligin urlaǵanyn jetkizgen.
Ury tamyz aıynyń basynda «Tonaý» jedel-izdestirý sharalaryn júrgizý kezinde qolǵa túsken. 37 jastaǵy oblys turǵyny budan bólek mamyr-tamyz aılary aralyǵynda Qaraǵandynyń ońtústik-shyǵys jáne ortalyq aýdandarynda jalpy 1 mıllıon teńge kóleminde bóten múlikti ıemdenýge qatysty 8 derekti jasaǵanyn moıyndady.
Qazirgi tańda azamat abaqtyda qamaýda otyr. Máselege qatysty tergeý amaldary júrip jatyr. Sondaı-aq, qylmystyq is qozǵaldy.
Budan bólek, polıtseıler qaraǵandylyq 20 jastaǵy azamatty ustady. Ol bóten avtokólikti úptep ketken. Sotqa deıingi tergeý amaldary kezinde ustalǵan azamat osyǵan uqsas 7 derekti moıyndady.
Polıtsııa halyqqa foto jáne vıdeofıksatsııasy bar domofondardy, beınebaqylaý men kúzet dabyl sıgnalızatsııasyn, terezelerge temir tor ornatýǵa keńes beredi. Múlikti tonaýdan aman alyp qalý úshin metall esikter men sapaly qulyptardyń da kómegi zor ekenin jetkizedi.
