Qaraǵandyda bir aıda 44 adamnyń aıaq-qoly úsip qalǵan, altaýyna ampýtatsııa jasaldy

QARAǴANDY. QazAqparat – Qaraǵandy oblysynda bir aıda 44 adamnyń aıaq-qoly úsip qalǵan, altaýyna ampýtatsııa jasaldy. Osy oraıda, jergilikti dárigerler úsik shalǵanda kórsetilýi tıis alǵashqy kómek jaıly aıtyp berdi, dep habarlaıdy QazAqparat tilshisi.

Bıylǵy 1 qarashadan bastap Qaraǵandy oblysynda aıaq-qoly úsip qalǵan 44 naýqas tirkeldi. Bul – ótken jyldyń osy kezeńimen salystyrǵanda 42%-ǵa kóp. Úsik shalǵandardyń 22-si statsıonarlyq em alý úshin aýrýhanaǵa jatqyzyldy, al alty patsıentke dárigerler ampýtatsııa jasaýǵa májbúr boldy.

Dárigerlerdiń aıtýynsha, kóbine aıaq-qoldyń úsýine tap bolǵan adamdarǵa alǵashqy kómek sharalary durys kórsetilmeıdi. Bul rette professor H. Maqajanov atyndaǵy kópsalaly aýrýhananyń travmatologi Erik Shonbaev esh jaǵdaıda úsik shalǵan aıaq-qoldy ysqylap, ystyq sýǵa malýǵa bolmaıtynyn eskertedi. Eń aldymen, ystyq sýsyndy kóbirek iship, deneniń úsigen bólikterin jylý oqshaýlaıtyn tańǵyshpen jylytý kerek. Tańǵysh qalyń maqta qabatynan jasalady, onymen úsik shalǵan aıaq-qoldy qymtap, ústinen oraý jáne jyly qolǵap nemese shulyq kıgizý qajet.

«Alǵashqy kómek kórsetilgennen keıin dereý medıtsınalyq uıymǵa habarlasý kerek. Ýaqtyly qabyldanǵan alǵashqy kómek sharalary aıaq-qol ampýtatsııasynyń aldyn alýǵa kómektesedi», - deıdi Erik Shonbaev.