Qaraǵandyda «Besoba» TK-degi úılerdi qabyldaǵan sheneýnikterge qatysty sot bastaldy
QARAǴANDY. 6 qarasha. QazAqparat - Qaraǵandy qalasyndaǵy Qazybek bı atyndaǵy sotta «Besoba» TK-degi úılerdi qabyldaǵan sheneýnikterge qatysty eki qylmystyq isti qaraý bastaldy, dep habarlaıdy agenttik tilshisi.
Bir qylmystyq is boıynsha sottalýshylar - Qaraǵandy ákiminiń burynǵy orynbasary Vıktor Ivanov pen oblystyń memlekettik sáýlet-qurylys baqylaý basqarmasynyń burynǵy bas mamany Dáýlet Altynbekov. Olar «Besobada» opyrylyp qulaǵan № 7 úıdi qabyldaǵan edi. V.Ivanov memlekettik qabyldaý komıssııasynyń tóraǵasy, D.Altynbekov - onyń orynbasary boldy.
Sol aldynda sondaı-aq Qaraǵandy ákiminiń burynǵy orynbasary Sergeı Grebenşıkov pen oblystyń memlekettik sáýlet-qurylys baqylaý basqarmasynyń burynǵy bastyǵy Tatıana Gýk jaýap berýde. Olar «Besoba» TK-gi apatty dep tanylǵan №№ 5, 6 úılerdi qabyldaý boıynsha memlekettik komıssııany basqardy.
Joǵaryda atalǵan tórt adam aýyr zardaptarǵa ákelip soqtyrǵan qyzmettik ókildikterin asyra paıdalaný (QR QK-niń 307 babyndaǵy 4 bólim) boıynsha aıyptalýda.
Tergeý nusqasy boıynsha, «turý qaýipsizdigi úshin kórineý jaramsyz nysandar» qabyldandy, al memlekettik qabyldaý komıssııasynyń basshylary «ózderiniń qyzmettik mindetterin memleket múddesine qarsy, ózderi jáne basqa tulǵalar úshin paıda jáne artyqshylyq tabý maqsatynda paıdalandy». Aıyptaý qorytyndysynda málimdengendeı, sottalýshylar keltirer zııan týraly bilgen, biraq «ózderiniń mindetterin qasaqana oryndamady». Alaıda, sottalýshylardyń eshqaısysy óz kinásin moıyndamaı otyr.
Tergeý málimetteri boıynsha, bir qylmystyq is boıynsha jábirlenýshi retinde 122 páter ıesi, ekinshisi boıynsha - 112 páter ıesi tanyldy. Budan basqa, Qaraǵandy qalasynyń ákimdigi jábirlengen tarap bolyp tabylady, óıtkeni TJ-dy joıýǵa jergilikti bıýdjettiń qarajaty jumsaldy.
Eki qylmystyq is boıynsha jábirlenýshiler ózderiniń materıaldyq shyǵynyn 2,5 mlrd. astam teńgege baǵalady. Alaıda shyǵyndy tóletý týraly azamattyq ister tıisti túrde toltyrylmaǵandyqtan, ázirshe sotta qaralmaıdy. Atap aıtqanda, jaýap berýshi, ıaǵnı shyǵyndy naqty óteýi tıis adam atalǵan joq. Jábirlenýshilerge azamattyq isterdiń kemshilikter joıylǵan soń qaralatyny túsindirildi.
QR QK-niń 307 baby 4 bólimi boıynsha 8 jylǵa deıin bas bostandyǵynan aıyrý jazasy qarastyrylǵan jáne belgili bir qyzmetterdi atqarýǵa nemese belgili bir ispen aınalysý quqyǵy shekteledi.
Esterińizge sala keteıik, 6 sáýirde Qaraǵandydaǵy «Besoba» TK-degi 5 qabatty úıdiń 4-kireberistik blok-sektsııasy opyrylyp tústi. Bul úı úsh jyl buryn úleskerlerdiń qatysýymen salynǵan edi. Buǵan deıin, atalmysh turǵyn úıde 1 sáýir kúni negizgi qurylys konstrýktsııalary buzylǵan bolatyn. Apatty úıden 138 adam kóshirildi. Qaraǵandy ákimdiginiń 3 sáýirdegi ókimimen úıge TJ tártibi engizildi.
TJ saldarynan bolǵan shyǵyn 545,3 mln. teńgege baǵalandy. Sonyń ishinde joıylǵan páterlerdiń baǵasy 328,8 mln. teńge boldy.
Úıdiń opyrylyp qulaýy faktisimen qurylysshylarǵa, jobalaýshylarǵa, memlekettik qabyldaý komıssııasynyń tóraǵasy men múshelerine, sondaı-aq memlekettik sáýlet-qurylys baqylaýyn júrgizgen qyzmettik tulǵalarǵa qatysty tórt qylmystyq is qozǵaldy. Sot sanktsııasymen Qaraǵandy ákiminiń burynǵy orynbasarlary Vıktor Ivanov pen Sergeı Grıbenşıkov, oblystyq memlekettik sáýlet-qurylys baqylaý basqarmasynyń burynǵy bastyǵy Aleksandr Vorobev qamaýǵa alyndy.
Qazirgi kezde zardap shekken úleskerlerge qala bıligi jańa úıler berdi. Osy eki arada «Besobadaǵy» basqa barlyq turǵyn úıler apatty dep tanyldy. Búginde búkil keshendi túgelimen buzyp, onyń ornynda jańa kópqabatty úıler salý josparlanǵan.
Bul úıdiń qurylysymen aınalysqan «Servıspromsnab» JShS-niń dırektory Andreı Malıanovqa qatysty qarjy polıtsııasy úleskerlerdi aldaý faktisimen qylmystyq isti tergeýde. Aldanǵan jurttyń aqshalaryn alyp qashqan kompanııanyń basshysyna izdeý jarııalandy.
