Qaraǵandyda baspana satyp alýǵa arnalǵan jańa baǵdarlamalar iske qosylady

QARAǴANDY. QazAqparat – Qurylys kólemi boıynsha Qaraǵandy oblysy respýblıkada tórtinshi orynda tur. Óńirde turǵyn úıdi paıdalanýǵa berý jyl ótken saıyn ósip keledi. Kezekte turǵandardy pátermen qamtamasyz etý eki ese artty, dep habarlaıdy QazAqparat tilshisi.

Qurylys salasyn damytý taqyryby onlaın rejımde ótken apparattyq keńeste talqylandy.

«2021 jyldyń 11 aıynda «Nurly jer» turǵyn úı-kommýnaldyq damytý memlekettik baǵdarlamasy aıasynda kólik, iri ónerkásip nysandaryn salý jáne ınfraqurylymdyq jobalardy iske asyrý esebinen qurylys jumystarynyń kólemi 381,2 mlrd teńge somasyna oryndaldy. Eger buryn orta eseppen jylyna kezekte turǵandarǵa myńǵa jýyq páter berilse, sońǵy jyldary bul kórsetkish 2-2,5 myń páterge ulǵaıdy. Bıyl turǵyn úı qurylysynyń ósý qarqyny saqtalyp otyr. Jyl qorytyndysy boıynsha 662 myń sharshy metr turǵyn úı paıdalanýǵa beriledi. Ol 2019 jyldyń deńgeıine qaraǵanda 60%-ǵa artyq», – dep baıandady qurylys, sáýlet jáne qala qurylysy basqarmasynyń basshysy Abzal Jaılybaev.

Ol jeke ınvestorlardyń turǵyn úı qurylysyna belsendi qatysa bastaǵanyn atap ótti.

Oblysta bıýdjet esebinen áleýmettik turǵyn úıdiń úlesi 15-16% - dy quraıdy, qalǵany – jeke qurylys.

«Biz «Otbasy bankpen» belsendi jumys isteımiz. Birqatar jańa ıpotekalyq baǵdarlamalardy iske qosamyz. Bul jastarǵa arnalǵan nesıelik turǵyn úı. Oǵan oblystyq bıýdjette bastapqy qarajat qarastyrylǵan, ári qaraı bul soma eki esege artady. Sondaı-aq, Qaraǵandyda jáne tórt seriktes qalada jumys isteıtin kenshiler men metallýrgterge arnalǵan baǵdarlama engizilýde», – dedi oblys ákimi Jeńis Qasymbek.

Apparattyq keńeste áleýmettik ınfraqurylymdy damytý týraly da aıtyldy.

Bıyl 10 bilim, jeti densaýlyq saqtaý, 11 sport, eki mádenıet nysandarynyń qurylysyna qarajat bólindi.