Qaraǵandyda baspa isiniń mamandary daıarlanady
QARAǴANDY. QazAqparat - Qaraǵandy kásiptik-tehnıkalyq kolledjinde jańa oqý jylynan bastap baspa isiniń mamandary daıarlanady, dep habarlaıdy QazAqparat tilshisi.
«20 maýsymnan bastap jańadan ashylǵan mamandyqqa qujattar qabyldap jatyrmyz. Onda jastar tegin bilim alady. Úlgili stýdentterge shákirtaqy taǵaıyndalady», - deıdi Qaraǵandy kásiptik-tehnıkalyq kolledjiniń dırektory Murat Esjanov QazAqparat tilshisine bergen suhbatynda.
Stýdentter elektrondy terim operatory jáne betteýshi mamandyǵyn da alyp shyǵýy múmkin. Olar kolledjdi bitirgen soń baspahanada, baspa kompanııalarynda, ınternet-resýrstarda betteýshi-dızaıner bolyp jumys isteı alady. Buǵan deıin mundaı mamandyqty tek Almaty qalasyndaǵy mamandandyrylǵan kolledjde ǵana alýǵa bolatyn edi.
Kolledj bazasyna osy salada mol tájirıbe jınaqtaǵan ári joǵary bilimdi kásibı mamandar shaqyrylǵan. Praktıkalyq jattyǵýlar kásiporyndarda júrgiziledi.
Aıta keteıik, kolledjde budan tys, kompıýter qurylǵylaryna qyzmet kórsetý tehnıgi, tehnık-baǵdarlamalaýshy, shashtaraz-modeler, hatshy-referent, elektr montajdaýshy sııaqty mamandyqtardy da tegin meńgerip shyǵýǵa bolady.
