Qaraǵandyda bas shyrshanyń shamdaryn jaǵýǵa 200 Aıaz ata men Aqshaqar qatysty
QARAǴANDY. QazAqparat – Qaraǵandyda qalanyń basty shyrshasy jarqyraı tústi. Jańa jyldyq shyrshany jaǵý rásimi Táýelsizdik alańynda ótti. Shara barysynda 200 Aıaz Ata men Aqshaqar dástúrli sherýge qatysty, dep habarlaıdy QazAqparat tilshisi.
Qaraǵandylyqtardy kele jatqan Jańa jylmen oblys ákimi Jeńis Qasymbek quttyqtady.
«Men osy keshte barlyqtaryńyzdy qarsy alyp turǵanyma qýanyshtymyn. Biz bala kezimizden Jańa jyldy jaqsy kóremiz, bul merekeden ǵajaıyptar, jańa jeńister, jańa qýanysh kútemiz. Ótken 2019 jyl bizdiń oblys úshin jaqsy boldy. Kóp jumystar atqaryldy, biraq alda áli de kóp mindetter tur. Barshańyzǵa myqty densaýlyq, baqyt, otbasylaryńyz, oblysymyz órkendeı berýin tileımin», - dedi Jeńis Qasymbek.Óńir basshysy shyrshany daryndy balalarmen birge jaqty. Bul marapatqa №92 gımnazııanyń oqýshysy, zııatkerlik jáne ǵylymı baıqaýlardyń júldegeri jáne jeńimpazy Aızere Jaǵypar jáne №93 gımnazııanyń oqýshysy, «Infoýrok» Halyqaralyq olımpıadasynyń, Respýblıkalyq ekochellendjiniń jeńimpazy Nazar Musaperov ıe boldy.
Sonymen qatar Táýelsizdik alańynda jáne sýburqaqtar kaskadynda jańa jyldyq ıllıýmınatsııa iske qosyldy. Shara sońynda jınalǵan qaýym merekelik otshashýdy tamashalady. Pırotehnıkalyq shoý úsh mınýtqa sozyldy. Otshashýdyń jarqyn shyraqtary 47 metrlik stelladan asyp, ásem órnektertege aınaldy.
Qaraǵandynyń 18 metrlik basty shyrshasy sharlarmen, 450 metrlik gırlıandylarmen jáne jarqyraǵan aıaz atalardyń beınesimen bezendirilgen. Ony qurý úshin eki gazel jasandy butaqtar qajet boldy.
Qalalyq mereke kóńildi bı keshine ulasty. Sahnada kórkemqnerpazdar ujymy óner kórsetti. Ótken jyldyń nyshany Dońyz estafetany kelesi jyldyń belgisi Tyshqanǵa tabys etti.
